കോണ്‍ഗ്രസ് മുക്ത സംസ്ഥാനമാകാന്‍ കര്‍ണ്ണാടകയ്ക്കും സമയമായെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. കര്‍ണ്ണാടകയില്‍ ജനസുരക്ഷാ യാത്രയില്‍ പങ്കെടുത്ത് സംസാരിക്കുകയായിരുന്നു യോഗി.

വടക്ക് കിഴക്കന്‍ സംസ്ഥാനങ്ങള്‍ക്ക് ഇടതിനെയും കോണ്‍ഗ്രസിനെയും പുറത്താക്കാന്‍ കഴിഞ്ഞെങ്കില്‍ എനിക്ക് തോന്നുന്നത് കര്‍ണ്ണാടകയ്ക്കും അതുതന്നെ ചെയ്യാന്‍ സമയമായെന്നാണ്, യോഗി കൂട്ടിച്ചേര്‍ത്തു. 20 വര്‍ഷത്തെ കമ്മ്യൂണിസ്റ്റ് ഭരണത്തിന് വിരാമമിട്ട് 59 സീറ്റുകളില്‍ 35 സീറ്റുകള്‍ നേടിയാണ് ത്രിപുരയില്‍ ബിജെപി ഭരണത്തില്‍ കേറുന്നത്.

കോണ്‍ഗ്രസ് നേതൃത്വം നല്‍കുന്ന സര്‍ക്കാര്‍ കര്‍ണ്ണാടകയില്‍ ഒന്നും ചെയ്തിട്ടില്ലെന്നും യോഗി കുറ്റപ്പെടുത്തി. കോണ്‍ഗ്രസ് തന്നെ ഒരു പ്രശ്‌നമായി തീര്‍ന്നിരിക്കുകയാണ്. ഇവിടുത്ത ജനങ്ങള്‍ക്ക് വേണ്ടി അവര്‍ ഒന്നും ചെയ്തിട്ടില്ല. ഇവിടെ വികസനമോ സുരക്ഷയോ ഇല്ല, ആദിത്യനാഥ് കൂട്ടിച്ചേര്‍ത്തു. മുഖ്യമന്ത്രി സിദ്ധരാമയ്യയുടെ നേതൃത്വത്തില്‍ സംസ്ഥാനത്ത് ആര്‍എസ്എസ് പ്രവര്‍ത്തകര്‍ക്ക് നേരെ വ്യാപക അക്രമമാണ് അരങ്ങേറുന്നതെന്നും യോഗി ആരോപിച്ചു.

ഫെബ്രുവരി മൂന്നിനാണ് ജനസുരക്ഷാ യാത്ര ആരംഭിച്ചത്. ഉത്തര്‍പ്രദേശ് മുഖ്യമന്ത്രിയായി അധികാരമേറ്റെടുത്തശേഷം യോഗിയുടെ മൂന്നാമത്തെ കര്‍ണ്ണാടക സന്ദര്‍ശനമാണിത്. 224 മണ്ഡലങ്ങളിലേക്കായി ഏപ്രില്‍മെയ് മാസങ്ങളിലാണ് കര്‍ണ്ണാടക നിയമസഭാ തെരഞ്ഞെടുപ്പ് നടക്കുന്നത്. വടക്ക് കിഴക്ക് സംസ്ഥാനങ്ങളിലെ തെരഞ്ഞെടുപ്പ് ഫലപ്രഖ്യാപനം വന്നതിനുശേഷം പ്രത്യേകിച്ച്, കര്‍ണ്ണാടകയില്‍ പുതിയ രാഷ്ട്രീയ വികാരം അലയടിക്കുന്നുണ്ടെന്നും യോഗി കൂട്ടിച്ചേര്‍ത്തു.