കേരളാ ഹജ്ജ് കമ്മിറ്റി ദേശീയ ഹജ്ജ് നയം ചോദ്യം ചെയ്തു നല്‍കിയ പരാതിയില്‍ സുപ്രീംകോടതി ഇന്ന് പരിഗണിക്കും. ഈ വര്‍ഷം കൂടുതല്‍ സീറ്റ് ഹജ്ജിന് അനുവദിക്കണമെന്ന ആവശ്യം അംഗീകരിക്കില്ലെന്നതാണ് കേന്ദ്ര നിലപാട്. 

6244 സീറ്റ് അധികമായുണ്ടെന്നും അത് കേരളത്തിനു നല്‍കണമെന്നും ഉള്ള ആവശ്യത്തിനെതിരെ കേന്ദ്രം സത്യവാങ്മൂലം നല്‍കിയിരുന്നു. അധികമുള്ള സീറ്റ് ഹജ്ജ് കമ്മിറ്റി ഓഫ് ഇന്ത്യ വഴി വിവിധ സംസ്ഥാനങ്ങള്‍ക്കായി നല്‍കുമെന്നതാണ് കേന്ദ്ര നിലപാട്. 

ചീഫ് ജസ്റ്റിസ് ദീപക് മിശ്ര യുടെ ബഞ്ചാണ് കേസ് പരിഗണിക്കുക.കേന്ദ്രം സുപ്രീംകോടതിയില്‍ ഹാജരാക്കിയ കണക്കും പാര്‍ലമെന്റില്‍വെച്ച കണക്കും തമ്മില്‍ വ്യത്യാസമുണ്ടെന്ന് കേരളാ ഹജ്ജ് കമ്മിറ്റി ബോധിപ്പിച്ച സാഹചര്യത്തിലാണ് കോടതി നടപടി.

അതേസമയം, കേരളാ ഹജ്ജ് കമ്മിറ്റിയുടെ വാദം കേന്ദ്രസര്‍ക്കാര്‍ തള്ളി. കേരളത്തിനു മാത്രമായി പ്രത്യേക ഭരണഘടനയില്ലെന്ന് കേന്ദ്രത്തിനുവേണ്ടി ഹാജരായ അഡീഷണല്‍ സോളിസിറ്റര്‍ ജനറല്‍ പിങ്കി ആനന്ദ് കോടതിയില്‍ വാദിച്ചു. ഹജ്ജ് നയത്തില്‍ കേരളത്തിന് പ്രത്യേക പരിഗണന നല്‍കാനാവില്ലെന്നും കേന്ദ്രം നിലപാട് വ്യക്തമാക്കി. കേസ് ബുധനാഴ്ച വീണ്ടും പരിഗണിക്കും.

സൗദി സര്‍ക്കാര്‍ അധികമായി അനുവദിച്ചതടക്കം 6422 സീറ്റ് ഈ വര്‍ഷം ഒഴിഞ്ഞു കിടപ്പുണ്ട്. ഇതടക്കമുള്ള കണക്കാണ് പാര്‍ലമെന്റില്‍ പറഞ്ഞത്. ഈ സീറ്റ് അഞ്ച് വര്‍ഷത്തെ സീനിയോറിറ്റി ഉള്ളവര്‍ക്ക് അനുവദിക്കാമെന്നാണ് കേരളം ആവശ്യപ്പെട്ടിരുന്നത്.