ബെംഗളൂരു നൈസ് റോഡില്‍ കാര്‍ മറിഞ്ഞ് മലയാളി വിദ്യാര്‍ത്ഥിനി അടക്കം മൂന്നു പേര്‍ മരിച്ചു. തൃശ്ശൂര്‍ സ്വദേശി ശ്രുതി ഗോപിനാഥ് ആണ് മരിച്ചത്. ശ്രുതിയേക്കുടാതെ ആന്ധ്ര സ്വദേശിനി അര്‍ഷിയകുമാരി, ജാര്‍ഖണ്ഡ് സ്വദേശിനി ഹര്‍ഷ ശ്രീവാസ്തവ് എന്നിവരാണ് മരിച്ചത്. വെള്ളിയാാഴ്ച രാവിലെ ഒമ്പതുമണിയോടെ ഇവര്‍ സഞ്ചരിച്ച കാര്‍ നിയന്ത്രണംവിട്ട് മറിയുകയായിരുന്നു. പിന്നില്‍ ഇരുന്നവരാണ് മരിച്ചത്. ഇവര്‍ മൂന്നു പേരും ബെംഗളൂരുവുല്‍ അലയന്‍സ് സര്‍വകലാശാലയില്‍ എംബിഎ വിദ്യാര്‍ത്ഥികളായിരുന്നു. വാഹനം ഓടിച്ച പ്രവീണ്‍, പവിത് കോഹ്ലി എന്നിവര്‍ക്ക് പരിക്കേറ്റു.

കാറില്‍ ചാര്‍ജ് ചെയ്യാന്‍ വച്ചിരുന്ന മൊബൈല്‍ ഫോണ്‍ എടുക്കുന്നതിനിടെ കാറിന്റെ നിയന്ത്രണം വിട്ട് മറിയുകയായിരുന്നു. അമിത വേഗത്തിലായിരുന്ന കാര്‍ പലതവണ മറിഞ്ഞ ശേഷം ഒരു പാരപ്പറ്റില്‍ ഇടിച്ചാണ് നിന്നത്. സമീപവാസികള്‍ കാര്‍ വെട്ടിപ്പൊളിച്ചാണ് അപകടത്തിന് ഇരകളായവരെ പുറത്തെടുത്തത്. ആശുപത്രിയില്‍ എത്തിച്ചപ്പോഴേക്കും പിന്‍സീറ്റിലിരുന്ന മൂന്നുപേരും മരിച്ചിരുന്നു.

തൃശ്ശൂര്‍ മുളങ്കുന്നത്തുകാവ് സ്വദേശി വി. ഗോപിനാഥന്‍ നായരുടെ മകളാണ് ശ്രുതി. ഹര്‍ഷയുടെ മാതാപിതാക്കള്‍ തിരുവനന്തപുരം ഐഎസ്‌ആര്‍ഒ ഉദ്യോഗസ്ഥരാണ്.