ഉത്തര്‍പ്രദേശിലെയും ബീഹാറിലെയും ഉപതെരഞ്ഞെടുപ്പുകളില്‍ ബി.ജെ.പിക്ക് വലിയ തിരിച്ചടി. പ്രകടനപത്രികയില്‍ പറഞ്ഞ വാഗ്ദാനങ്ങള്‍ പാലിക്കാത്തതും ക്രമസമാധാന പ്രശ്‌നങ്ങളുമാണ് ബി.ജെ.പിക്ക് തിരിച്ചടിയായത്. ത്രിപുരയില്‍ ഏകപക്ഷീയ വിജയം നേടിയ ബി.ജെ.പി പ്രവര്‍ത്തകരെ തെരഞ്ഞെടുപ്പ് ഫലം നിരാശരാക്കി. മായാവതിയുടെ ബിഎസ്പിയുമായി സഹകരിച്ച് ഗൊരഖ്പൂരില്‍ മല്‍സരിക്കുന്ന സമാജ്‌വാദി പാര്‍ട്ടി സ്ഥാനാര്‍ഥി പ്രവീണ്‍ കുമാര്‍ നിഷാദിന്റെ ലീഡ് 30,000 കവിഞ്ഞു. ബിജെപിയുടെ ഉപേന്ദ്ര ദത്ത് ശുക്ല ഇവിടെ രണ്ടാമതാണ്. മറ്റൊരു മണ്ഡലമായ ഫുല്‍പുരില്‍ സമാജ്‌വാദി പാര്‍ട്ടി നാഗേന്ദ്ര സിങ് പട്ടേലിന് നാല്‍പ്പതിനായിരം വോട്ടുകളുടെ ലീഡുണ്ട്. ബിജെപിയുടെ കൗശലേന്ദ്ര സിങ് പട്ടേലാണു ഇവിടുത്തെ സ്ഥാനാര്‍ത്ഥി.

മുഖ്യമന്ത്രി യോഗി ആദിത്യനാഥ് തുടര്‍ച്ചയായി അഞ്ച് തവണ ജയിച്ച മണ്ഡലമാണിത്. ഉപതെരഞ്ഞെടുപ്പ് പൊതുതിരഞ്ഞെടുപ്പിന് മുന്നോടിയായുള്ള ട്രയലാണെന്നാണ് യോഗി ആദിത്യനാഥ് പറഞ്ഞിരുന്നത്. എന്നാല്‍ നിയമസഭാ തെരഞ്ഞെടുപ്പില്‍ ചരിത്രവിജയം ഒരു വര്‍ഷം പിന്നിടുമ്പോഴേക്കും ജനപിന്തുണ കുറഞ്ഞിരിക്കുന്നു. മാത്രമല്ല കാല്‍നൂറ്റാണ്ടായി വര്‍ഗ ശത്രുക്കളായിരുന്ന ബി.എസ്.പിയും സമാജ് വാദി പാര്‍ട്ടിയും ഒരു കുടക്കീഴിലുമായി. ഇത് അടുത്ത പാര്‍ലമെന്റ് തെരഞ്ഞെടുപ്പിനെ ബാധിക്കും. രണ്ടു മണ്ഡലങ്ങളിലും കോണ്‍ഗ്രസ് പ്രത്യേകം സ്ഥാനാര്‍ഥികളെ നിര്‍ത്തുന്നുണ്ട്– ഫുല്‍പുരില്‍ മനീഷ്മിശ്രയും ഗോരഖ്പുരില്‍ സുരീത കരീമും. 2017ലെ നിയമസഭാ തെരഞ്ഞെടുപ്പില്‍ 403 അംഗ നിയമസഭയില്‍ 325 സീറ്റിന്റെ വലിയ ഭൂരിപക്ഷമാണ് ബിജെപി നേടിയത്.

ഉപതിരഞ്ഞെടുപ്പു നടന്ന ബിഹാറിലെ അരരിയയിലും ബിജെപി ഏറെ പിന്നിലാണ്. ആര്‍ജെഡി സ്ഥാനാര്‍ഥി സര്‍ഫറാസ് ആലത്തിന് 40,000 വോട്ടിന്റെ ഭൂരിപക്ഷമുണ്ട്. ആര്‍ജെഡി എംപിയുടെ മരണത്തെത്തുടര്‍ന്നാണ് അരരിയയില്‍ തെരഞ്ഞെടുപ്പു വേണ്ടിവന്നത്. എന്നാല്‍ നിയമസഭാ മണ്ഡലത്തിലേക്കുള്ള രണ്ട് സീറ്റുകളില്‍ നടന്ന മല്‍സരത്തില്‍ ബിജെപിയും മറ്റൊരിടത്ത് ആര്‍ജെഡിയും ലീഡ് ചെയ്യുന്നു. ബാബുവ നിയമസഭാ മണ്ഡലത്തില്‍ ബിജെപി സ്ഥാനാര്‍ഥി റിങ്കി റാണി 13,000ത്തില്‍ അധികം വോട്ടുകള്‍ക്കാണ് മുന്നിലുള്ളത്. അതേസമയം, ജെഹനാബാദില്‍ ആര്‍ജെഡി സ്ഥാനാര്‍ഥി കുമാര്‍ കൃഷ്ണ മോഹന്‍ 35000ത്തില്‍ അധികം വോട്ടുകള്‍ക്ക് ലീഡ് ചെയ്യുന്നു.

അതേസമയം യു.പിയില്‍ വോട്ടെണ്ണല്‍ കേന്ദ്രങ്ങളില്‍ മാധ്യമങ്ങള്‍ക്ക് വിലക്കേര്‍പ്പെടുത്തിയതിനെതിരെ സമാജ് വാദി പാര്‍ട്ടി അടക്കമുള്ള പ്രതിപക്ഷ അംഗങ്ങള്‍ പാര്‍ലമെന്റില്‍ ബഹളം വെച്ചു. വോട്ടിംഗ് മന്ദഗതിയിലാക്കിയത് ഭരണസംവിധാനം ഉപയോഗിച്ച് തെരഞ്ഞെടുപ്പ് അട്ടിമറിക്കാനാണെന്ന് സമാജ് വാദി പാര്‍ട്ടി എം.പിമാര്‍ ആരോപിച്ചു. സ്പീക്കര്‍ സുമിത്രാ മഹാജന്‍ ഇത് പരിഗണിക്കാതെ ബില്ലുകള്‍ പാസാക്കി.