ജപ്പാന്‍ പര്യടനത്തിന്റെ രണ്ടാം ദിവസം പ്രധാനമന്ത്രി നരേന്ദ്ര മോഡി ടോക്കിയോയിലെത്തി. ക്യോട്ടോയില്‍ രണ്ടു ദിവസത്തെ സന്ദര്‍ശനം പൂര്‍ത്തിയാക്കിയശേഷമാണ്‌ അദ്ദേഹം ടോക്കിയോയില്‍ എത്തിയത്‌. ഔദ്യോഗിക ചര്‍ച്ചകളും കൂടിക്കാഴ്‌ചകളും ഇന്ന്‌ ആരംഭിക്കും.
ഇന്നലെ ക്യോട്ടോ സര്‍വകലാശാല സന്ദര്‍ശിച്ച മോദി, അരിവാള്‍രോഗത്തിനു പ്രതിവിധി കണ്ടുപിടിക്കാനുള്ള സാധ്യതയെക്കുറിച്ച്‌ അവിടെയുള്ള ഗവേഷകരോട്‌ ആരാഞ്ഞു. 2012ലെ വൈദ്യശാസ്‌ത്ര നൊബേല്‍ സമ്മാനം നേടിയ എസ്‌. യമനകയോടും ഇതുസംബന്ധിച്ചു മോദി ചര്‍ച്ച നടത്തി.
ഇന്ത്യയിലെ ആദിവാസി മേഖലകളില്‍ അനേകംപേരുടെ മരണത്തിനിടയാക്കുന്നതാണ്‌ അരിവാള്‍രോഗം. മരുന്നു കണ്ടുപിടിക്കുന്നതിനുള്ള പരീക്ഷണങ്ങളില്‍ സംയുക്‌തമായി സഹകരിക്കാമെന്നു ജപ്പാന്‍ അറിയിച്ചതായി വിദേശകാര്യവൃത്തങ്ങള്‍ സൂചിപ്പിച്ചു.
ഇന്നലെ ടോജി, കിനാകുജി എന്നീ സ്‌ഥലങ്ങളിലെ പ്രശസ്‌ത ബുദ്ധക്ഷേത്രങ്ങള്‍ കാണാനെത്തിയ മോദി, സന്ദര്‍ശനത്തിനിടെ സാധാരണക്കാരുമായും വിനോദസഞ്ചാരികളുമായും ഇടപഴകുകയും ഫോട്ടോകള്‍ക്കു പോസ്‌ ചെയ്യുകയും ആളുകള്‍ക്കു ഹസ്‌തദാനം നല്‍കുകയും കുഞ്ഞുങ്ങളെ ഓമനിക്കുകയും ചെയ്‌തു `ജനകീയനായി.
ജപ്പാന്‍ പ്രധാനമന്ത്രി ഷിന്‍സോ ആബെയും ക്ഷേത്രസന്ദര്‍ശനവേളയില്‍ മോദിയോടൊപ്പം ഉണ്ടായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha