ഇരട്ടപ്പദവി വിവാദത്തില്‍ തെരഞ്ഞെടുപ്പ് കമ്മീഷന്‍ അയോഗ്യരാക്കിയ 20 ആംആദ്മി എം.എല്‍.എമാര്‍ക്ക് ആശ്വാസം. എം.എല്‍.എമാരുടെ ഭാഗം കേള്‍ക്കാതെയാണ് തെരഞ്ഞെടുപ്പ് കമ്മീഷന്‍ ഇവരെ അയോഗ്യരാക്കിയതെന്ന് ഡല്‍ഹി ഹൈക്കോടതി വ്യക്തമാക്കി. അതിനാല്‍ എം.എല്‍.എമാരുടെ പരാതികള്‍ തെരഞ്ഞെടുപ്പ് കമ്മീഷന്‍ വീണ്ടും പരിഗണിക്കണമെന്നും കോടതി നിര്‍ദ്ദേശിച്ചു. കമ്മീഷന്‍ നടപടി തെറ്റാണെന്നും കോടതി നിരീക്ഷിച്ചു. ഡല്‍ഹിയിലെ ജനങ്ങളുടെ വിജയമാണെന്ന് മുഖ്യമന്ത്രി അരവിന്ദ് കെജ്‌രിവാള്‍ പ്രതികരിച്ചു. സത്യം ജയിച്ചെന്നും അദ്ദേഹം വ്യക്തമാക്കി.

കഴിഞ്ഞ ജനുവരി 19നാണ് ഡല്‍ഹിയിലെ ആംആദ്മി പാര്‍ട്ടി സര്‍ക്കാരിലെ  ഇരട്ടപ്പദവി വിവാദത്തില്‍ കുടുങ്ങിയ 20  എംഎല്‍എമാരെ കമ്മീഷന്‍ അയോഗ്യരാക്കിയത്. ഇവരെ അയോഗ്യരാക്കണമെന്ന് തിരഞ്ഞെടുപ്പു കമ്മിഷന്‍ രാഷ്ട്രപതിയോട് ശുപാര്‍ശയും ചെയ്തിരുന്നു. എഴുപത് അംഗ നിയമസഭയില്‍ എഎപിക്ക് 66 എംഎല്‍എമാരായിരുന്നു. 20 എംഎല്‍എമാരെ അയോഗ്യരാക്കിയിട്ടും ഭരണം നഷ്ടപ്പെട്ടില്ല.നിയമസഭാ തെരഞ്ഞെടുപ്പില്‍ എഎപി മികച്ച വിജയം നേടിയതിനു പിന്നാലെയാണ് ഇരട്ട പ്രതിഫലം കൈപ്പറ്റുന്നെന്ന വിവാദം എം.എല്‍.എമാര്‍ക്കെതിരെ ഉയര്‍ന്നത്. അന്തിമ തീരുമാനമെടുക്കാന്‍ നേരത്തേ ഡല്‍ഹി ഹൈക്കോടതി തെരഞ്ഞെടുപ്പു കമ്മിഷനെ ചുമതലപ്പെടുത്തിയിരുന്നു.

കെജ്‌രിവാള്‍ മുഖ്യമന്ത്രിയായ ശേഷം 21 എഎപി എംഎല്‍എമാരെ പാര്‍ലമെന്ററി സെക്രട്ടറിമാരായി നിയമിച്ചിരുന്നു. പാര്‍ലമെന്ററി സെക്രട്ടറിമാരുടേതിനു തുലായമായിരുന്നു ഇവരുടെ പ്രതിഫലം. അതിനാല്‍ ഇരട്ട പദവിയാണെന്നും ഇവരെ അയോഗ്യരാക്കണമെന്നും ആവശ്യപ്പെട്ട് പ്രശാന്ത് പട്ടേല്‍ എന്ന അഭിഭാഷകനാണ് തെരഞ്ഞെടുപ്പ് കമ്മിഷനു പരാതി നല്‍കിയത്. 2015 മാര്‍ച്ച് 13 മുതല്‍ 2016 സെപ്റ്റംബര്‍ എട്ടു വരെയാണ് എംഎല്‍എമാര്‍ ഇരട്ടപ്പദവി വഹിച്ചത്.