ജമ്മു കശ്മീരിലെ വെള്ളപ്പൊക്കത്തിലും മലയിടിച്ചിലിലും വന്‍ നാശനഷ്ടമാണ് ഉണ്ടായിക്കൊണ്ടിരിക്കുന്നത്. ദുരന്തത്തില്‍ പെട്ടവരെ രക്ഷപ്പെടുത്തുന്നതിനിടയില്‍ ഒന്‍പതു ജവാന്മാര്‍ ഒഴുക്കില്‍പ്പെട്ടു. ജവാന്മാരെ കണ്ടെത്തുന്നതിനുള്ള ശ്രമം നടത്തുകയാണെന്ന് സൈന്യം അറിയിച്ചു. കശ്മീരിന്റെ വിവിധ ഭാഗങ്ങളില്‍ ഇപ്പോഴും കനത്ത മഴ തുടരുകയാണ്.

ത്സലം നദി അപകടകരമാം വിധത്തില്‍ കവിഞ്ഞൊഴുകുന്നതിനാല്‍ ശ്രീനഗറിന്റെ തെക്കന്‍ ഭാഗങ്ങളില്‍ അതീവജാഗ്രതാ നിര്‍ദേശം പുറപ്പെടുവിച്ചിട്ടുണ്ട്. പലയിടങ്ങളിലും നദി അപകടനില കവിഞ്ഞാണ് ഒഴുകുന്നത്. നിരവധി വീടുകള്‍ വെള്ളത്തിനടിയിലായി. രണ്ട് ആശുപത്രികളും മുങ്ങിപ്പോയിട്ടുണ്ട്.

എയര്‍പോര്‍ട്ട് റോഡിലൂടെയുള്ള ഗതാഗതം തടസ്സപ്പെട്ടു.രണ്ടു ദിവസത്തിനുള്ളില്‍ 100ലധികം പേരാണ് പ്രളയത്തില്‍ കൊല്ലപ്പെട്ടത്. കട്ര വഴിയുള്ള ട്രെയിന്‍ ഗതാഗതവും മണ്ണിടിച്ചിലിനെ തുടര്‍ന്ന് നിര്‍ത്തി വച്ചു. കഴിഞ്ഞ ദിവസം രജൗരിയില്‍ ബസ് നദിയില്‍ വീണ് കാണാതായവരെ ഇതുവരെ കണ്ടെത്താന്‍ കഴിഞ്ഞിട്ടില്ല. 25 പേരുടെ മൃതദേഹം മാത്രമാണ് സൈന്യത്തിന് കണ്ടെടുക്കാന്‍ കഴിഞ്ഞത്.

300 കിലോമീറ്റര്‍ ദൈര്‍ഘ്യം വരുന്ന ജമ്മുശ്രീനഗര്‍ ദേശീയപാത അടച്ചിട്ടു. കനത്ത മഴയില്‍ പല റോഡുകളും ഒലിച്ചു പോയിട്ടുണ്ട്. യാത്രക്കാരുള്ള 1200ഓളം വാഹനങ്ങള്‍ മുന്നോട്ട് നീങ്ങാനാവാതെ ദേശീയപാതയില്‍ കുടുങ്ങിക്കിടക്കുകയാണ്.