നിതാരി കൂട്ടക്കൊലക്കേസില്‍ വധശിക്ഷയ്ക്ക് വിധിക്കപ്പെട്ട പ്രതി സുരേന്ദ്ര കോലിയുടെ ശിക്ഷ നടപ്പിലാക്കുന്നത് സുപ്രീംകോടതി ഒരാഴ്ചത്തേക്ക് സ്‌റ്റേ ചെയ്തു. ഇന്ന് പുലര്‍ച്ചെയാണ് സുപ്രീം കോടതി വധശിക്ഷ സ്‌റ്റേ ചെയ്തത്.

വധശിക്ഷയ്ക്ക് വിധിക്കപ്പെട്ടവരുടെ പുന:പരിശോധനാ ഹര്‍ജി പരിഗണിക്കണമെന്ന കഴിഞ്ഞയാഴ്ചത്തെ സുപ്രീം കോടതി വിധിയുടെ പശ്ചാത്തലത്തിലാണ് വധശിക്ഷ സ്‌റ്റേ ചെയ്തത്. കോലിയുടെ പുനപ്പരിശോധനാ ഹര്‍ജി തള്ളിക്കളഞ്ഞിരുന്നുവെന്ന് കാട്ടി കോലിയുടെ അഭിഭാഷകന്‍ കോടതിയെ സമീപിച്ചു. ഇതേത്തുടര്‍ന്ന് ജസ്റ്റിസ് എച്ച്.എല്‍ ദത്തു വധശിക്ഷ ഒരാഴ്ചത്തേക്ക് സ്‌റ്റേ ചെയ്യുകയായിരുന്നു. ഹര്‍ജി കോടതി അടുത്തയാഴ്ച പരിഗണിക്കും.

വെള്ളിയാഴ്ച കോലിയുടെ വധശിക്ഷ നടപ്പാക്കുന്നതിനുള്ള എല്ലാ നടപടിക്രമങ്ങളും മീറ്ററ് ജയിലില്‍ പൂര്‍ത്തിയാക്കിയിരുന്നു.

ഉത്തര്‍പ്രദേശിലെ നോയ്ഡയ്ക്കടുത്ത് നിതാരിയില്‍ വ്യവസായിയായ മൊനീന്ദര്‍ സിങ്ങിന്റെ വീട്ടിലെ ജോലിക്കാരനായിരുന്ന കോലിയെ കുട്ടികളെ തട്ടിക്കൊണ്ടുവന്ന് പീഡിപ്പിച്ചുകൊന്ന കേസിലാണ് അറസ്റ്റുചെയ്തത്. 2005-06 കാലയളവില്‍ പീഡനത്തിനും കൊലപാതകത്തിനുമായി 16 കേസുകളാണ് 42കാരനായ കോലിക്കെതിരെ ഉണ്ടായിരുന്നത്.