ജമ്മു കാശ്മീരിലെ പ്രളയ കെടുതികള്‍ക്ക് ശമനമില്ല. ആയിരക്കണക്കിന് ആള്‍ക്കാരാണ് ഇപ്പോഴും പ്രളയ ബാധിത പ്രദേശത്ത് കുടുങ്ങി കിടക്കുന്നത്. അരനൂറ്റാണ്ടിനിടെയുണ്ടായ വലിയ പ്രളയത്തില്‍ കാശ്മീരിലെ മിക്ക പ്രദേശങ്ങളും മുങ്ങി വന്‍ നാശം വരുത്തി. നാലുദിവസത്തിലേറെയായി തുടരുന്ന മഴയിലും അനുബന്ധ കെടുതിയിലും മരിച്ചവരുടെ എണ്ണം 175കവിഞ്ഞു. ലക്ഷത്തോളം പേരെ പ്രളയം ബാധിച്ചിട്ടുണ്ട്‌. പതിനായിരക്കണക്കിനു വീടുകളും നിരവധി കെട്ടിടങ്ങളും തകര്‍ന്നു. പ്രദേശത്തെ വൈദ്യുതി, വാര്‍ത്താവിനിമയ സംവിധാനങ്ങള്‍ പൂര്‍ണമായും നിലച്ചു.

പ്രളയക്കെടുതി തുടരുന്ന ജമ്മു കശ്‌മീരില്‍ കുടുങ്ങിയ ആയിരക്കണക്കിനാളുകളെ രക്ഷിക്കാനായി വന്‍ രക്ഷാപ്രവര്‍ത്തനം തുടങ്ങി. കരസേനയും വ്യോമ സേനയും ഊര്‍ജിതരക്ഷാദൗത്യമാണു നടത്തുന്നത്‌. കശ്‌മീരില്‍ കുടുങ്ങിയ 184 മലയാളികളില്‍ പതിനെട്ടു പേരെ ഡല്‍ഹിയിലെത്തിച്ചു.

ഇതിനിടെ പാക് അധിനിവേശ കാശ്മീരിലെ വെളളപ്പൊക്കത്തില്‍ ദുരിതമനുഭവിക്കുന്നവര്‍ക്ക് സഹായം വാഗ്ദ്ദാനം ചെയ്ത ഇന്ത്യക്ക് പാക് പ്രധാനമന്ത്രി നവാസ് ഷെരീഫ് നന്ദി രേഖപ്പെടുത്തി. ഇന്ത്യയുടെ സഹായം സ്വീകരിക്കണമോ എന്നതിനെക്കുറിച്ച് ആലോചിച്ച് തീരുമാനമെടുക്കുമെന്ന് നവാസ് ഷെരീഫ് അറിയിച്ചു. പാക് അധിനിവേശ കാശ്മീരിന് ആയിരം കോടി രൂപയുടെ ധനസഹായം നല്‍കാന്‍ തയ്യാറാണെന്നു കാട്ടി പാകിസ്ഥാന്‍ പ്രധാനമന്ത്രി നവാസ് ഷെരീഫിന് ഇന്ത്യന്‍ പ്രധാനമന്ത്രി നരേന്ദ്ര മോദി കത്തയച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha