നേരത്തെ വിസ വിലക്ക് ഏര്പ്പെടുത്തിയ മോഡിക്ക് വൈറ്റ്ഹൗസ് ആതിഥ്യമരുളുന്നത് രണ്ടു ദിവസം
യുഎന് പൊതുസഭയില് പങ്കെടുക്കാന് ഈ മാസം ഒടുവില് ന്യൂയോര്ക്കിലെത്തുന്ന മോഡിക്കു രണ്ടു ദിവസമാണ് വൈറ്റ് ഹൗസ് ആതിഥ്യമരുളുന്നത്. ഉഭയകക്ഷി ചര്ച്ചയ്ക്കല്ലാതെ യുഎസിലെത്തുന്ന നേതാവിനെ പ്രസിഡന്റിന്റെ ഒദ്യോഗിക വസതിയില് സ്വീകരിക്കുന്നത് അപൂര്വമാണ്. തുടര്ച്ചയായ രണ്ടു ദിവസങ്ങളില് പ്രസിഡന്റുമായി ചര്ച്ചയ്ക്ക് യുഎസ് താത്പര്യമെടുക്കുന്നതും അപൂര്വം. ഗുജറാത്ത് കലാപത്തിന്റെ പേരില് ഒമ്പതു വര്ഷം വിലക്കു കല്പ്പിച്ച് യുഎസ് മാറ്റി നിര്ത്തിയ മോദിയെയാണ് ഇത്തരത്തില് സ്വീകരിക്കുന്നത് എന്നുള്ളതും പ്രാധാന്യം.
ഈ മാസം 29, 30 തിയതികളിലാണ് മോഡിക്ക് വൈറ്റ് ഹൗസില് ആതിഥ്യം. ഇന്ത്യയുമായുള്ള ബന്ധത്തിന് യുഎസ് നല്കുന്ന പ്രാധാന്യമാണ് മോദിയുട രണ്ടു ദിവസത്തെ സ്വീകരണമെന്ന് യുഎസ് ദേശീയ സുരക്ഷാ കൗണ്സില് കാറ്റ്ലിന് ഹെയ്ഡന് പറഞ്ഞു. ഉഭയകക്ഷി, സാമ്പത്തിക, വ്യാപാര, സുരക്ഷാ, പ്രതിരോധ കാര്യങ്ങളില് ഇരു നേതാക്കളും ചര്ച്ച നടത്തുമെന്നും ഹെയ്ഡന്.
ഗുജറാത്ത് കലാപം തടയാന് ശ്രമിച്ചില്ലെന്നാരോപിച്ച് 2005ലാണ് മോദിക്കു യുഎസ് വിസ വിലക്ക് ഏര്പ്പെടുത്തിയത്. തുടര്ന്ന് പല ഘട്ടങ്ങളിലും ഈ നിലപാട് ആവര്ത്തിച്ചു. എന്നാല് ബിജെപിയുടെ പ്രധാനമന്ത്രി സ്ഥാനാര്ഥിയായി മോഡിയെ പ്രഖ്യാപിച്ചതോടെ അമേരിക്ക നിലപാടില് അയവു വരുത്തി. മോഡി വിരുദ്ധ നിലപാട് സ്വീകരിച്ചിരുന്ന ഇന്ത്യയിലെ യുഎസ് സ്ഥാനപതി നാന്സി പവല് രാജി വയ്ക്കുകയും ചെയ്തു.
മോഡി അധികാരമേറ്റെടുത്തതോടെ അദ്ദേഹത്തിനുണ്ടായിരുന്ന വിലക്ക് സ്വാഭാവികമായി മാറി എന്നു പ്രഖ്യാപിച്ച യുഎസ്, സ്റ്റേറ്റ് സെക്രട്ടറി ജോണ് കൊറിയെയും പ്രതിരോധ സെക്രട്ടറി ചക് ഹേഗലിനേയും ഇന്ത്യയിലേക്ക് അയയ്ക്കുകയും ചെയ്തിരുന്നു. ലോക വ്യാപാര സംഘടനയുടെ വ്യാപാര പ്രോത്സാഹന കരാറില് ഇന്ത്യയെ ഒപ്പു വയ്പ്പിക്കുകയും പ്രതിരോധ രംഗത്ത് ബന്ധം ശക്തമാക്കുകയുമായിരുന്നു ഇവരുടെ വരവിന്റെ ലക്ഷ്യം. എന്നാല് നിലപാടുകള് മാറ്റാന് കേന്ദ്രം തയാറായില്ല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
