സംസ്ഥാനത്തെ 292 ബാറുകള്‍ ഈ മാസം 30 വരെ പൂട്ടരുതെന്ന് സുപ്രീം കോടതി. ബാറുകള്‍ അടച്ചുപൂട്ടാനുള്ള സര്‍ക്കാര്‍ തീരുമാനം സ്‌റ്റേ ബാറുടമകളുടെ പരാതിക്കെതിരെ സര്‍ക്കാര്‍ നല്‍കിയ തടസ ഹര്‍ജിയും കോടതി പരിഗണിച്ചു. 16നകം ഹൈക്കോടതിയില്‍ സര്‍ക്കാര്‍ എതിര്‍ സത്യവാങ്മൂലം നല്‍കണം. ഹൈക്കോടതിയുടെ പരിഗണനയിലിരിക്കുന്ന ഹര്‍ജികള്‍ ഉടന്‍ തീര്‍പ്പാക്കണമെന്നും സുപ്രീംകോടതി നിര്‍ദ്ദേശം നല്‍കി. ഇന്നു രാത്രി 11 മണിയോടെ ബാറുകള്‍ പൂട്ടണമെന്നാണ് സര്‍ക്കാര്‍ നിര്‍ദ്ദേശം നല്‍കിയിരുന്നത്. 

എല്ലാ ബാറുകളും ഒറ്റയടിക്ക് പൂട്ടുന്നത് എന്തിനാണെന്ന് സുപ്രീം കോടതി ചോദിച്ചു. സമ്പൂര്‍ണ മദ്യവര്‍ജനമാണ് സര്‍ക്കാര്‍ ഉദ്ദേശിക്കുന്നതെങ്കില്‍ എല്ലാ ബാറുകളും അടച്ചുപൂട്ടേണ്ടതാണ്. ഫൈവ് സ്റ്റാര്‍ ബാറുകള്‍ മാത്രം തുറന്നു പ്രവര്‍ത്തിക്കുന്നതിന്റെ ഉദ്ദേശം എന്താണെന്നും കോടതി ചോദിച്ചു. ജസ്റ്റിസുമാരായ അനില്‍ ആര്‍.ദവെ, യു.യു.ലളിത് എന്നിവരടങ്ങിയ ബഞ്ചാണ് ഹര്‍ജി പരിഗണിച്ചത്.
സംസ്ഥാനത്ത് ബാറുകള്‍ വലിയ സാമൂഹിക വിപത്താണ് ഉയര്‍ത്തുന്നതെന്നും മദ്യപാനം കുടുംബങ്ങള്‍ ശിഥിലമാക്കുന്നുവെന്നും സര്‍ക്കാര്‍ തടസ ഹര്‍ജിയില്‍ അറിയിച്ചു. സമ്പൂര്‍ണ മദ്യനിരോധനം സാധ്യമാകണമെങ്കില്‍ ഫൈവ് സ്റ്റാര്‍ ബാറുകള്‍ കൂടി അടച്ചു പൂട്ടേണ്ടതല്ലേ എന്നു കോടതി ചോദ്യമുന്നയിച്ചു. ഒരു ചെറിയ ശതമാനം മാത്രമെ ഫൈവ് സ്റ്റാര്‍ ബാറുകളെ ആശ്രയിക്കുന്നുള്ളൂ എന്നാണ് സര്‍ക്കാര്‍ ഇതിനു മറുപടി പറഞ്ഞത്.
എന്നാല്‍ ബിവറേജസ് ഔട്ട്‌ലെറ്റുകള്‍ തുറന്നു പ്രവര്‍ത്തിക്കുന്ന സാഹചര്യത്തില്‍ ആര്‍ക്കും യഥേഷ്ടം മദ്യം ലഭിക്കുന്ന അവസ്ഥയാണെന്ന് ബാറുടമകള്‍ വാദിച്ചു. ബാറുടമകളുടെ ആവശ്യം കൂടി പരിഗണിച്ചാണ് സെപ്റ്റംബര്‍ 30 വരെ സമയം നല്‍കാന്‍ സുപ്രീം കോടതി തീരുമാനിച്ചത്.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha