മക്ക മസ്ജിദ് സ്‌ഫോടനക്കേസില്‍ സ്വാമി അസീമാനന്ദയുടെ കുറ്റസമ്മതം സ്വന്തം ഇഷ്ടപ്രകാരമല്ലെന്ന് എന്‍.ഐ.എ പ്രത്യേക കോടതി. പൊലീസ് കസ്റ്റഡിയിലായിരുന്നപ്പോള്‍ ചിത്രീകരിച്ച അസീമാനന്ദയുടെ കുറ്റസമ്മത ദൃശ്യങ്ങള്‍ വിശ്വാസ യോഗ്യമല്ലെന്നും അത് ബാഹ്യപ്രേരണ മൂലമാണെന്നും കോടതി ചൂണ്ടിക്കാട്ടി. ഏപ്രില്‍ 16ന് പ്രത്യേക ജഡ്ജായ കെ. രവീന്ദര്‍ റെഡ്ഡിയും സമാന വിധി പറഞ്ഞിരുന്നു. ആര്‍.എസ്.എസ് എന്ന സംഘടനയുമായി ബന്ധമുണ്ടെന്ന പേരില്‍ ഒരാളെ സാമ്യൂഹ്യ വിരുദ്ധനും വര്‍ഗീയവാദിയുമായി കാണാനാവില്ലെന്നും ആര്‍.എസ്.എസ് ഒരു നിരോധിത സംഘടനയല്ലെന്നും കോടതി വ്യക്തമാക്കി.

ഹൈദരാബാദ് ജയിലിലെ രണ്ട് സഹതടവുകാരായ മഖ്ബൂല്‍ ബിന്‍ അലി, ശൈഖ് അബ്ദുല്‍ ഖലീം എന്നിവരോട് അസീമാനന്ദ കുറ്റസമ്മതം നടത്തിയെന്ന പ്രോസിക്യൂട്ടറുടെ വാദവും കോടതി തള്ളി. അസീമാനന്ദയുടെ കൂടെ ഇരുവരും ജയിലിലുണ്ടായിരുന്നു എന്നത് തെളിയിക്കാനായിട്ടില്ലെന്നും പ്രാഥമിക അന്വേഷണം നടത്തിയ സി.ബി.ഐക്കോ അന്വേഷണ ഉദ്യോഗസ്ഥര്‍ക്കോ ഇതുമായി ബന്ധപ്പെട്ട തെളിവുകള്‍ ഹാജരാക്കാനായിട്ടില്ലെന്നും കോടതി പറഞ്ഞു. റിമോര്‍ട്ട് കണ്‍ട്രോള്‍ ഉപയോഗിച്ചായിരുന്നു 400 വര്‍ഷത്തോളം പഴക്കമുള്ള മക്ക മസ്ജിദില്‍ സ്‌ഫോടനം നടത്തിയത്.

2007 മെയ് മാസം ഒരു വെള്ളിയാഴ്ച ദിവസമായിരുന്ന ദാരുണമായ സംഭവം അരങ്ങേറിയത്. സ്‌ഫോടനത്തില്‍ ഒമ്പത് പേര്‍ കൊല്ലപ്പെടുകയും 58 ഓളം പേര്‍ക്ക് ഗുരുതരമായ പരിക്കേല്‍ക്കുകയും ചെയ്തു. കേസില്‍ പ്രതികളായ 11 പേരെയും കോടതി കഴിഞ്ഞ ഏപ്രില്‍ 18ന് വെറുതെ വിട്ടിരുന്നു.