ബ്രിട്ടണില്‍ ഇന്ത്യന്‍ നഴ്‌സ് ജസിന്ത ആത്മഹത്യ ചെയ്ത സംഭവത്തില്‍ ഓസ്‌ട്രേലിയന്‍ റേഡിയോജോക്കി മാപ്പു പറഞ്ഞു. ബ്രിട്ടീഷ് രാജകുടുംബാഗം കെയ്റ്റ് മിഡില്‍ടണിന്റെ ഗര്‍ഭകാല അസുഖത്തിന്റെ വിവരങ്ങള്‍ ചോര്‍ത്തി നല്‍കിയെന്ന ആരോപണത്തെ തുടര്‍ന്നാണ് ജസിന്ത ആത്മഹത്യ ചെയ്തത്.ഓസ്‌ട്രേലിയന്‍ റേഡിയോ സ്‌റ്റേഷനില്‍ നിന്നുള്ള വ്യാജ ടെലിഫോണ്‍ കോളിന് മറുപടിയായാണ് മംഗലാപുരം സ്വദേശിയായ ജസിന്ത വിവരം നല്‍കിയത്.
ബ്രിട്ടീഷ് രാജകുടുംബത്തില്‍ നിന്ന് എന്ന വ്യാജേനയാണ് ഓസ്‌ട്രേലിയന്‍ റേഡിയോ ജോക്കി ആശുപത്രിയില്‍ വിളിച്ച് കെയ്റ്റ് മിഡില്‍ടണിന്റെ സ്വകാര്യ വിവരങ്ങള്‍ ആരാഞ്ഞത്. വ്യാജ ഫോണ്‍കോള്‍ ചെയ്ത റേഡിയോ ജോക്കി മാപ്പു പറഞ്ഞതിനു പുറമെ ജസിന്തയുടെ കുടുംബത്തിന് 550,000 യുഎസ് ഡോളര്‍ സഹായം നല്‍കുകയും ചെയ്തു.
ധനസഹായം കൊണ്ട് ജസിന്തയുടെ കുടുംബത്തിന് സംഭവിച്ച നഷ്ടം നികത്താനാകില്ലെന്ന് അറിയാമെന്നും ജസിന്തയുടെ കുടുംബത്തിന് ചെറിയ സഹായമാകട്ടെ എന്നു കരുതിയാണ് തുക കൈമാറുന്നതെന്നും റേഡിയോ സ്‌റ്റേഷന്‍ വ്യക്താവ് പറഞ്ഞു.
2012 ഡിസംബര്‍ ഏഴിനാണ് ജസിന്ത ആത്മഹത്യ ചെയ്തത്. സിഡ്‌നിയിലെ ടുഡെ എഫ്എം സ്റ്റേഷനില്‍ നിന്നാണ് വ്യാജ ഫോണ്‍കോള്‍ ലഭിച്ചത്. സംഭവം വിവാദമായതിനെ തുടര്‍ന്ന് എഫ്എം സ്റ്റേഷനെതിരെ വ്യാപക വിമര്‍ശനം ഉയര്‍ന്നിരുന്നു.