തിരഞ്ഞെടുപ്പ് ഫലത്തിലെ ട്വിസ്റ്റ്; ബിജെപി നിരാശയില്‍ ഡല്‍ഹിയില്‍ നടത്താനിരുന്ന പത്രസമ്മേളനം മാറ്റിവച്ച് അമിത് ഷാ; പുറം വാതിലിലൂടെ അധികാരത്തിലേറാനാണ് കോണ്‍ഗ്രസ് ശ്രമിക്കുന്നതെന്ന് യെദ്യൂരപ്പ
കര്‍ണാടക തിരഞ്ഞെടുപ്പ് ഫലത്തില്‍ അപ്രതീക്ഷിത ട്വിസ്റ്റില്‍ ബിജെപി ക്യാമ്പുകള്‍ നിരാശയില്‍. വിജയാഘോഷം നിര്‍ത്തി വയ്ക്കാന്‍ പ്രവര്‍ത്തകര്‍ക്ക് ബിജെപി കേന്ദ്ര നേതൃത്വത്തിന്റെ നിര്‍ദേശം. ബിജെപി പ്രസിഡന്റ് അമിത് ഷാ മൂന്നിന് ന്യൂഡല്‍ഹിയില്‍ നടത്താനിരുന്ന പത്രസമ്മേളനവും മാറ്റി വച്ചു. വൈകിട്ട് ആറിന് പ്രധാനമന്ത്രി നരേന്ദ്രമോദി ബിജെപി ഓഫിസില്‍ എത്തില്ലെന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്.
തിരഞ്ഞെടുപ്പുഫലം പുറത്തുവന്നു തുടങ്ങിയ ആദ്യ മണിക്കൂറുകളില്‍ ബിജെപി വന്‍ മുന്നേറ്റമാണ് നടത്തിയത്. കൂറ്റന്‍ ഭൂരിപക്ഷത്തോടെ ഒറ്റയ്ക്ക് അധികാരത്തിലേക്ക് എന്ന തോന്നലുണ്ടായതോടെ രാജ്യമെങ്ങും ബിജെപി കേന്ദ്രങ്ങളില്‍ ആഘോഷം തുടങ്ങിയിരുന്നു. അതേസമയം നിയമസഭാ തിരഞ്ഞെടുപ്പ് ഫലത്തിന് പിന്നാലെ രാഷ്ട്രീയ അനിശ്ചിതത്വം നില്‍ക്കുന്ന കര്‍ണാടകയില്‍ ഗവര്‍ണര്‍ സംസ്ഥാന കോണ്‍ഗ്രസ് അധ്യക്ഷനെ കാണാന്‍ കൂട്ടാക്കിയില്ല.
കര്‍ണാടക കോണ്‍ഗ്രസ് അധ്യക്ഷന്‍ ജി.പരമേശ്വരയുടെ നേതൃത്വത്തിലുള്ള പാര്‍ട്ടി പ്രതിനിധി സംഘം ഗവര്‍ണര്‍ വാജുഭായ് വാലയെ കാണാന്‍ രാജ്ഭവനിലെത്തിയെങ്കിലും അദ്ദേഹം കൂടിക്കാഴ്ചയ്ക്ക് അനുമതി നിഷേധിക്കുകയായിരുന്നു. ഇതേ തുടര്‍ന്ന് സംഘം മടങ്ങി. ഇതിനിടെ മുഖ്യമന്ത്രി സിദ്ധരാമയ്യ ഗവര്‍ണറെ കണ്ട് രാജിക്കത്ത് കൈമാറി.
കര്‍ണാടകയില്‍ സര്‍ക്കാരുണ്ടാക്കാന്‍ കോണ്‍ഗ്രസിന്റെ പിന്‍വാതില്‍ ശ്രമം ജനങ്ങള്‍ അംഗീകരിക്കില്ലെന്ന് മുതിര്‍ന്ന ബിജെപി നേതാവും മുഖ്യമന്ത്രി സ്ഥാനാര്‍ഥിയുമായിരുന്ന ബി.എസ്. യെദ്യൂരപ്പ. ഗവര്‍ണര്‍ ക്ഷണിക്കേണ്ടത് ഏറ്റവും വലിയ ഒറ്റകക്ഷിയായ ബിജെപിയെയാണെന്നും യെദ്യുരപ്പ വാര്‍ത്താസമ്മേളനത്തില്‍ പറഞ്ഞു. കര്‍ണാടകയിലെ ജനങ്ങള്‍ കോണ്‍ഗ്രസിനെ തള്ളി ബി.ജെ.പിയെ അംഗീകരിച്ചിരിക്കുകയാണ്. ജനങ്ങള്‍ കോണ്‍ഗ്രസ് മുക്ത കര്‍ണാടകം എന്ന സ്വപ്നത്തിലേക്ക് നീങ്ങുകയാണ്. പുറം വാതിലിലൂടെ അധികാരത്തിലേറാനാണ് കോണ്‍ഗ്രസ് ശ്രമിക്കുന്നത്. ഇത് ജനങ്ങള്‍ തള്ളിക്കളയുമെന്നും യെദ്യൂരപ്പ പറഞ്ഞു.
മുതിര്‍ന്ന നേതാക്കളുമായി സംസാരിച്ച് ഭാവി കാര്യങ്ങളില്‍ തീരുമാനമെടുക്കും. ഭാരതീയ ജനതാപര്‍ട്ടിക്ക് അഭിമാനിക്കാവുന്ന വിജയം സമ്മാനിച്ച കര്‍ണാടകയിലെ ജനങ്ങളെ അഭിനന്ദിക്കുകയാണെന്നും യെദ്യുരപ്പ ചൂണ്ടിക്കാട്ടി.
https://www.facebook.com/Malayalivartha
