വിശ്വാസ വോട്ടെടുപ്പ് നേരിടാതെ ബി.എസ് യെദ്യൂരപ്പ രാജിവച്ചൊഴിയുമ്പോള്‍ എച്ച്.ഡി കുമാരസ്വാമി മുഖ്യമന്ത്രി കസേരയിലേക്കെത്തുന്നത് ദേവഗൗഡ പ്രധാനമന്ത്രിയയതിനു സമാനമായ സാഹചര്യത്തില്‍.

1996ല്‍ 13 ദിവസം അധികരത്തിലിരുന്ന വാജ്‌പേയി രാജിവച്ചൊഴിഞ്ഞപ്പോഴാണ് ദേവഗൗഡ പ്രധാനമന്ത്രിയായതെങ്കില്‍ മൂന്നു നാള്‍ അധികാരത്തില്‍ തുടര്‍ന്ന യെദ്യൂരപ്പ രാജിവച്ചതാണ് കുമാരസ്വാമിയെ മുഖ്യമന്ത്രി കസേരയിലേക്കെത്തിക്കുന്നത്.

2006ല്‍ പാര്‍ലമെന്റില്‍ കേവല ഭൂരപക്ഷം തെളിയിക്കാനാകാതെയാണ് അന്നത്തെ പ്രധാനമന്ത്രി എ.ബി വാജ്‌പേയ്ക്ക് സ്ഥാനമൊഴിയേണ്ടി വന്നത്. കേവലം 13 ദിവസം മാത്രമാണ് വാജ്‌പേയ്ക്ക് പ്രധാനമന്ത്രി കസേരയില്‍ തുടരാനായത്. തൊട്ടുപിന്നാലെ അപ്രതീക്ഷിതമായാണ് മൂന്നാം മുന്നണിയുടെ പ്രധാനമന്ത്രി സ്ഥാനാര്‍ഥിയായി എച്ച്.ഡി ദേവഗൗഡയെ തെരഞ്ഞെടുത്തത്.

1996ലെ പൊതുതെരഞ്ഞെടുപ്പില്‍ പി.വി നരസിംഹറാവുവിന്റെ നേതൃത്വത്തിലുള്ള കോണ്‍ഗ്രസ് പരാജയപ്പെട്ടു. ആര്‍ക്കും ഭൂപക്ഷമില്ലാത്ത അവസ്ഥ. ഇതിനിടെ ഏറ്റവും വലിയ ഒറ്റകക്ഷിയായ ബി.ജെ.പി സര്‍ക്കാരുണ്ടാക്കാന്‍ അവകാശവാദമുന്നയിച്ചു. അന്നത്തെ രാഷ്ട്രപതിയായിരുന്ന ശങ്കര്‍ദയാല്‍ ശര്‍മ്മ ബി.ജെ.പിയെ സര്‍ക്കാരുണ്ടാക്കാന്‍ ക്ഷണിക്കുകയും ചെയ്തു. അങ്ങനെ വാജ്‌പേയ് ഇന്ത്യയുടെ പത്താമത്തെ പ്രധാനമന്ത്രിയായി. എന്നാല്‍ ഭരണത്തിലേറി പതിമൂന്നാമത്തെ ദിവസം വിശ്വാസവോട്ടെടുപ്പിന് തൊട്ടുമുന്‍പ് അദ്ദേഹം രാജിവച്ചൊഴിയുകയായിരുന്നു. ഇതേത്തുടര്‍ന്നാണ് കോണ്‍ഗ്രസ്ബിജെപി ഇതര കക്ഷികള്‍ ചേര്‍ന്ന് മൂന്നാം മുന്നണി രൂപീകരിക്കുകയും ജനതാദള്‍ പ്രതിനിധായ എച്ച്.ഡി ദേവഗൗഡയെ പ്രധാനമന്ത്രിയാക്കാന്‍ തീരുമാനിക്കുകയും ചെയ്തത്. അന്ന് ഈ മുന്നണിയെ കോണ്‍ഗ്രസ് പുറത്തുനിന്ന് പിന്തുണച്ചു. അങ്ങനെ 11 മാസത്തോളം ദേവഗൗഡ ഇന്ത്യയുടെ പതിനൊന്നാമത്തെ പ്രധാനമന്ത്രിയായി.

പിതാവ് ദേവഗൗഡയുടേതിനു സമാനമായ ചരിത്രം ഇന്ന് മകന്‍ കുമാരസ്വാമിയുടെ രാഷ്ട്രീയ ജീവിതത്തിലും സംഭവിച്ചിരിക്കുകയാണ്. കര്‍ണാടക തെരഞ്ഞെടുപ്പില്‍ ആര്‍ക്കും കേവലഭൂരപക്ഷം നേടാനാകാതെ വന്നതോടെയാണ് കുമാരസ്വാമിയെ മുഖ്യമന്ത്രിയാക്കിയുള്ള സര്‍ക്കാരുണ്ടാക്കാന്‍ കോണ്‍ഗ്രസ് അവകാശവാദമുന്നയുച്ചത്.

എന്നാല്‍ ഏറ്റവും വലിയ ഒറ്റകക്ഷിയായ ബിജെപിയുടെ അവകാശവാദം ഗവര്‍ണര്‍ അംഗീകരിക്കുകയും അങ്ങനെ യെദ്യൂരപ്പ മുഖ്യമന്ത്രിയാകുകയും ചെയ്തു. ഗവര്‍ണറുടെ തീരുമാനം കോണ്‍ഗ്രസും ജെഡിഎസു കോടതിയില്‍ ചോദ്യം ചെയ്തതോടെയാണ് മൂന്നാമത്തെ ദിവസം അതയാത് ശനിയാഴ്ച വിശ്വാവോട്ടെടുപ്പ് നടത്തണമെന്നു കോടതി ഉത്തരവിട്ടത്. ഇതേതുടര്‍ന്നാണ് യെദ്യൂരപ്പ അധികാരത്തിലേറി മൂന്നാം ദിനത്തില്‍ വിശ്വാസവോട്ടെടുപ്പിനു കളമൊരുങ്ങിയതും കുമാരസ്വാമിക്കു മുഖ്യമന്ത്രി പദത്തിലേക്കെത്താന്‍ വഴി തെളിഞ്ഞതും.