യെദ്യൂരപ്പയുടെ രാജികൊണ്ടൊനന്നും കോണ്‍ഗ്രസിന് ആശ്വാസം ലഭിക്കുന്നില്ല. ജെഡിഎസിലെ എംഎല്‍എമാരെ ഒപ്പം കൂട്ടി വീണ്ടും അധികാരം നിലനിര്‍ത്തുക എന്നത് വലിയ കടമ്പ ഇപ്പോഴും കോണ്‍ഗ്രസിന് മുന്നില്‍ അവശേഷിക്കുന്നു. യെദ്യൂരപ്പ രാജിവെച്ചതോടെ കുമാരസ്വാമിയെ ഗവര്‍ണര്‍ മന്ത്രിസഭ രൂപീകരിക്കാന്‍ ഉടന്‍തന്നെ ക്ഷണിക്കും. അടുത്ത ദിവസങ്ങളില്‍ തന്നെ വിശ്വാസവോട്ടെടുപ്പ് നടക്കുകയും ചെയ്യും. അതുകൊണ്ട് തന്നെ ഇപ്പോള്‍ എംഎല്‍എമാരെ എങ്ങനെയാണ് സൂക്ഷിച്ചത് അതുപോലെ തന്നെ തുടര്‍ന്നും സംരക്ഷിക്കേണ്ടിവരും. ആദ്യത്തെ പിരിമുറുക്കത്തില്‍ നിന്നും മാറി എംഎല്‍എമാരെ ഫ്രീയാക്കി വിട്ടാല്‍ ഉടന്‍ റാഞ്ചാന്‍ തയ്യാറായി അമിത് ഷായും കൂട്ടരും രംഗത്തെത്തുമെന്നകാര്യം പകല്‍ പോലെ വ്യക്തമാണ്. ദേശീയ രാഷ്ട്രീയത്തില്‍ മോദിക്ക് ബദലായി ഒരു സഖ്യകക്ഷി കൂടി പിറന്നു എന്നതാണ് ഇതില്‍ പ്രധാന പ്രശ്‌നമായി വിലയിരുത്തുന്നത്. രാഹുല്‍ ഗാന്ധിക്കും കോണ്‍ഗ്രസിനും കര്‍ണാടകത്തില്‍ കുമാരസ്വാമിയെ മുഖ്യമന്ത്രിയാക്കി ഭരണം നിലനിര്‍ത്താന്‍ ശരിക്കും ബുദ്ധിമുട്ടേണ്ടിവരും.

എങ്കിലും ജെഡിഎസിനാകും കടുത്ത ഭീഷണിയുണ്ടാകുക. 37 എംഎല്‍എമാരുടെ പാര്‍ട്ടിയെ പിളര്‍ത്താനാകും ശ്രമങ്ങള്‍ കൂടുതല്‍ നടക്കുക. ഇപ്പോഴത്തെ മാധ്യമ ശ്രദ്ധ മാറിയാല്‍ ചാക്കിട്ടുപിടുത്തം വേഗത്തിലാകും. എന്നാല്‍, കര്‍ണാടകത്തില്‍ തിരിച്ചടിയേറ്റ ബിജെപി കൂടുതല്‍ അപകടകാരികളാകുമെന്നാണ് വിലയിരുത്തല്‍. അടുത്തൊരു തിരഞ്ഞെടുപ്പ് അടക്കം മുന്നില്‍ കണ്ടായിരുന്നു യെദ്യൂരപ്പ വികാര നിര്‍ഭരമായ പ്രസംഗം.

യെദ്യൂരപ്പ പ്രസംഗിച്ചത് ഇങ്ങനെയാണ് 'കഴിഞ്ഞ രണ്ടുവര്‍ഷത്തിനിടെ ഞാന്‍ കര്‍ണാടകയില്‍ ഉടനീളം സഞ്ചരിച്ചു. ജനങ്ങള്‍ നല്‍കിയ പിന്തുണയും സ്‌നേഹവും മറക്കാന്‍ കഴിയില്ല. ജനങ്ങള്‍ ഞങ്ങള്‍ക്ക് 104 സീറ്റ് നല്‍കി അനുഗ്രഹിച്ചു. പ്രധാനമന്ത്രി നരേന്ദ്ര മോദിയും അമിത്ഷായുമാണ് എന്നെ മുഖ്യമന്ത്രിയാക്കിയത്. എപ്പോഴെങ്കിലും തിരഞ്ഞെടുപ്പിന് മുന്‍പ് പ്രധാനമന്ത്രി മുഖ്യമന്ത്രി സ്ഥാനാര്‍ത്ഥിയെ പ്രഖ്യാപിക്കുന്നത് കണ്ടിട്ടുണ്ടോ? ഞാന്‍ പാര്‍ട്ടി പ്രസിഡന്റായത് 2016ലാണ്. പാര്‍ട്ടി കോണ്‍ഗ്രസും ജെഡിഎസും തിരഞ്ഞെടുപ്പില്‍ പരാജയപ്പെട്ടു. ഏറ്റവും വലിയ ഒറ്റകക്ഷിയെന്ന നിലയിലാണ് ബിജെപിയെ ഗവര്‍ണര്‍ ക്ഷണിച്ചത്. ആറര കോടി ജനങ്ങള്‍ പിന്തുണച്ചത് ബിജെപിയെ ആണ്. കോണ്‍ഗ്രസിനും ജനതാദളിനും ജനാധിപത്യത്തില്‍ വിശ്വാസമില്ല. യെഡിയൂരപ്പ പറഞ്ഞു.