നഗരത്തിലെ ഗതാഗത കുരുക്കിനെതിരെ കുതിരപ്പുറത്തേറി പ്രതിഷേധവുമായി യുവാവ്. ബെംഗളൂരുവിലാണ് കണ്ടാൽ രസകരമെങ്കിലും ഏറെ ചിന്തിപ്പിക്കുന്ന രീതിയിലുള്ള ഈ സംഭവം. ഓഫീസിലേക്കെത്തുന്ന വഴികളിലെല്ലാം ഗതാഗത കുരുക്കിൽ കുടുങ്ങിയപ്പോൾ ഇതിനോട് പ്രതിഷേധിക്കാൻ സോഫ്റ്റ്വെയ‌ർ എഞ്ചിനീയർ ആയ രൂപേഷ് കുമാർ തെരഞ്ഞെടുത്തത് രസകരമായ മാർഗമായിരുന്നു.

ഓഫീസിലെ തന്‍റെ അവസാന ദിവസം രൂപേഷ് കുതിരപ്പുറത്തെത്തുകയായിരുന്നു. രൂപേഷിന്‍റെ വീട്ടിൽ നിന്ന് എംബസി ഗോൾഫ് ലിംഗിലുള്ള ഓഫീസിലേക്ക് എത്താൻ 10 കിലോ മീറ്റർ ദൂരമുണ്ട്. അതുകൊണ്ടുതന്നെ ഒരു മണിക്കൂറിലേറെ കുരുക്കിൽ കിടന്നാണ് ദിവസവും ഓഫീസിലെത്തുന്നത്. 7 മണിക്ക് പുറപ്പെട്ട രൂപേഷിന് കുതിരപ്പുറത്തിരുന്ന് ഓഫീസിലെത്താൻ 7 മണിക്കൂറെടുത്തു. 2 മണിക്ക് രൂപേഷ് തന്‍റെ ജോലിസ്ഥലത്തെത്തി. സ്വകാര്യ കമ്പനിയിലെ ജോലി ഉപേക്ഷിച്ച് ഒരു സ്റ്റാർട്ട് അപ്പ് തുടങ്ങാനുള്ള തയ്യാറെടുപ്പിലാണ് ഇദ്ദേഹം. ആളുകളെ അത്രമേൽ ബുദ്ധിമുട്ടിലാക്കുന്ന ഈ പ്രതിസന്ധിക്ക് ശാശ്വതമായ ഒരു പരിഹാരമുണ്ടാകണമെന്നാണ് ഈ പ്രതിഷേധത്തിലൂടെ താൻ ആഗ്രഹിക്കുന്നതെന്ന് രൂപേഷ് പറയുന്നു.