വീണ്ടും കാണാതായി മറ്റാരെയുമല്ല കോണ്‍ഗ്രസിന്റെ ഗോവയിലെ യാത്രയില്‍ പങ്കെടുത്തതിന് പിന്നാലെ ലോക്സഭാ പ്രതിപക്ഷ നേതാവ് രാഹുല്‍ ഗാന്ധി വിദേശത്തേക്ക് പോയതായി റിപ്പോര്‍ട്ട്. വിയറ്റ്‌നാം തലസ്ഥാനമായ ഹനോയിയിലേക്കാണ് രാഹുല്‍ യാത്ര ചെയ്തതെന്നാണ് ബന്ധപ്പെട്ട വൃത്തങ്ങളെ ഉദ്ധരിച്ചുള്ള വിവരം. എന്നാല്‍, സന്ദര്‍ശനത്തെക്കുറിച്ച് കോണ്‍ഗ്രസ് ഔദ്യോഗിക അറിയിപ്പോ യാത്രാപരിപാടിയോ പുറത്തുവിട്ടിട്ടില്ല. സ്വകാര്യ സന്ദര്‍ശനമായാണ് യാത്രയെ വിശേഷിപ്പിക്കുന്നത്.

രാഹുൽ ​ഗാന്ധി വിദേശത്ത് പോയ വീഡിയോ സമൂഹമാധ്യമ അക്കൗണ്ടിൽ പങ്കുവെച്ച് ബിജെപി. ഒരു യാത്രക്കാരൻ പകർത്തിയ വീഡിയോ ആണ് ബിജെപി പങ്കുവെച്ചത്. വിയറ്റ്നാമിലേക്കുള്ള വിമാനത്തിൽ ബിസിനസ് ക്ലാസിൽ രാഹുൽ ​ഗാന്ധി ഇരിക്കുന്ന വീഡിയോ ആണ് യാത്രക്കാരൻ പകർത്തിയത്. ‘കള്ളം പറഞ്ഞ് പറഞ്ഞ് ക്ഷീണിച്ചു ഇനി വിയറ്റ്നാമിൽ ഒന്ന് കറങ്ങിവരാം’ എന്ന് പരിഹസിച്ചാണ് ബിജെപി വീഡിയോ പങ്കുവെച്ചിരിക്കുന്നത്. ​ഗ്യാനേഷ് കുമാർ രാജി വെക്കണമെന്ന് ആവശ്യപ്പെട്ടുള്ള പ്രതിഷേധങ്ങൾ തുടരുന്നതിനിടെയാണ് രാഹുൽ ​ഗാന്ധിയുടെ വിദേശയാത്ര.

രാഹുൽ എന്തിനാണ് വിദേശത്തേക്ക് പോകുന്നതെന്ന് കോൺ​ഗ്രസ് വിശദീകരിച്ചിട്ടില്ല.ഞായറാഴ്ച ദക്ഷിണ ഗോവയിലെ മര്‍ഗാവില്‍ കോണ്‍ഗ്രസ് സംഘടിപ്പിച്ച 'ഗോയ് രക്ഷോണ്‍ യാത്ര'യില്‍ രാഹുല്‍ ഗാന്ധി പങ്കെടുത്തിരുന്നു. കോണ്‍ഗ്രസ് നേതാക്കള്‍ക്കും പ്രവര്‍ത്തകര്‍ക്കുമൊപ്പം ഏകദേശം രണ്ട് കിലോമീറ്റര്‍ നീണ്ട മാര്‍ച്ചിലും അദ്ദേഹം അണിനിരന്നു. ഇതിന് പിന്നാലെയാണ് വിദേശയാത്ര നടത്തിയതായുള്ള റിപ്പോര്‍ട്ടുകള്‍ പുറത്തുവന്നത്.യാത്രയെച്ചൊല്ലി തിങ്കളാഴ്ച ബിജെപി രാഹുല്‍ ഗാന്ധിക്കെതിരെ വിമര്‍ശനവുമായി രംഗത്തെത്തി.

രാഹുല്‍ വീണ്ടും വിദേശ അവധിയാത്രയ്ക്ക് പോയെന്നാണ് ബിജെപി നേതാവ് ഭണ്ഡാരി ആരോപിച്ചത്. രാജ്യത്ത് രാഷ്ട്രീയ പ്രതിഷേധങ്ങളും വിവാദങ്ങളും നിലനില്‍ക്കുമ്പോള്‍ രാഹുല്‍ വിദേശത്തേക്ക് പോകുന്നതിനെ ചോദ്യം ചെയ്ത അദ്ദേഹം, യാത്രയുടെ ലക്ഷ്യം എന്താണെന്നും പരിഹാസരൂപേണ ചോദിച്ചു.'നവരാത്രിക്കാലത്ത് രാഹുല്‍ ഗാന്ധി വിദേശത്ത് എന്തുചെയ്യുകയാണ്? അവധിയെടുക്കുകയാണോ, അതോ അദ്ദേഹത്തിന്റെ ''കുഴപ്പങ്ങള്‍ സൃഷ്ടിക്കുന്ന കൂട്ടാളികളെ'' കാണുകയാണോ? ജോലി ചെയ്യുന്നതിനേക്കാള്‍ കൂടുതല്‍ സമയം വിശ്രമിക്കുന്നയാളാണ് രാഹുല്‍;

എന്നിട്ടാണ് ''വോട്ട് മോഷണം'' എന്ന് വിളിച്ചുപറയുന്നത്' എന്നായിരുന്നു എക്‌സിലെ ഭണ്ഡാരിയുടെ കുറിപ്പ്. വിദേശയാത്ര നടത്തുന്ന രാഹുലിനെ അവധിവേഷത്തില്‍ ചിത്രീകരിക്കുന്ന കാരിക്കേച്ചറും അദ്ദേഹം പങ്കുവച്ചു.മുമ്പും രാഹുലിന്റെ വിദേശയാത്രകള്‍ വിവാദത്തില്‍..രാഹുല്‍ ഗാന്ധിയുടെ വിദേശയാത്രകള്‍ മുന്‍പും രാഷ്ട്രീയവിവാദങ്ങള്‍ക്ക് കാരണമായിട്ടുണ്ട്. രാജ്യത്ത് പ്രതിഷേധങ്ങള്‍ ശക്തമാകുന്ന ഘട്ടങ്ങളില്‍ അദ്ദേഹം വിദേശത്തേക്ക് പോകുന്നുവെന്നാണ് വിമര്‍ശകരുടെ ആരോപണം.
പ്രതിഷേധങ്ങള്‍ക്ക് നേതൃത്വം നല്‍കേണ്ട സമയത്ത് രാഹുല്‍ രാജ്യത്തില്ലാത്തത് പ്രക്ഷോഭങ്ങളുടെ തുടര്‍ച്ചയെ ബാധിക്കുമെന്ന വാദവും വിമര്‍ശകര്‍ ഉന്നയിക്കുന്നു.