ഒരു സ്‌റ്റൈലിനായി പെരുമ്പാമ്പിനെ കഴുത്തിലില്‍ തൂക്കി ഫോട്ടോക്ക് പോസ് ചെയ്യുന്നതിനിടെ വനപാലകന് പാമ്പ് കൊടുത്ത പണിയുടെ ദൃശ്യങ്ങളാണ് ഇപ്പോള്‍ വൈറലായിക്കൊണ്ടിരിക്കുന്നത്. പാമ്പിനെ കയ്യില്‍ കിട്ടിയതോടെ തോളിലിട്ട് ജനങ്ങളെ കോരിത്തരിപ്പിക്കലായിരുന്നു വനപാലകന്റെ ഉദ്ദേശം. എന്നാല്‍ പാമ്പാകട്ടെ അദ്ദേഹത്തിനിട്ട് ഒരു പണി കൊടുത്തു. അയാളുടെ കഴുത്തില്‍ അവന്‍ വരിഞ്ഞു മുറുക്കി. കൊല്‍കത്തയില്‍ നിന്നും 600 കിലോമീറ്ററോളം അകലെയായി ജല്‍പൈഗുരി ഗ്രാമത്തിലായിരുന്നു സംഭവമുണ്ടായത്.

ഗ്രാമത്തില്‍ അതിക്രമിച്ച് കടന്ന് ആടിനെ വയറ്റിലാക്കിയ ഭീമന്‍ പെരുമ്പാമ്പിനെ പിടികൂടാന്‍ ഗ്രാമവാസികളാണ് വനപാലകനെയും രണ്ട് കൂട്ടാളികളെയും വിളിച്ച് വരുത്തിയത്. 18 അടി നീളവും 40 കിലോയോളം ഭാരവുമുള്ള പെരുമ്പാമ്പിനെ പിടികൂടിയ വനപാലകന്‍ തന്റെ ധൈര്യം കാണിക്കാനും ജനങ്ങളെ ആവേശം കൊള്ളിക്കാനുമായി പാമ്പിനെ തോളത്തിട്ട് ഫോട്ടോയെടുക്കാനായി തടിച്ച് കൂടിയവര്‍ക്ക് അവസരം നല്‍കുകയായിരുന്നു.

കാട്ടില്‍ മാത്രം ജീവിച്ച് പരിചയമുള്ള പെരുമ്പാമ്പ് ആളും ആരവവും സെല്‍ഫിയും ഫ്‌ലാഷുമൊക്കെ കണ്ട് പരിഭ്രാന്തനായി വനപാലകന്റെ കഴുത്തിന് ചുറ്റും ചുരുണ്ടു. ആരവം കൂടുന്നതിന് അനുസരിച്ച് പാമ്പ് വനപാലകന്റെ കഴുത്തിനിട്ട പിടി മുറുക്കിയതോടെ ധൈര്യം ചോര്‍ന്ന വനപാലകന്‍ സെല്‍ഫിക്കാരെയും ജനങ്ങളെയും അവഗണിച്ച് ഓടാന്‍ തുടങ്ങി. നിലവിളിയുമായി ജനങ്ങളും പിറകെ ഓടി. പാമ്പിന്റെ വാലിലുണ്ടായിരുന്ന പിടുത്തവും കൈവിട്ടിരുന്നു.തുടര്‍ന്ന് മറ്റൊരു വന ഉദ്യോഗസ്ഥന്‍ വനപാലകന്റെ രക്ഷക്കെത്തുകയായിരുന്നു. 'വാലില്‍ പിടിക്കൂ, വാലില്‍ പിടിക്കൂ' എന്ന് തന്റെ കൂടെ വന്ന കീഴുദ്യോഗസ്ഥനോട് അയാള്‍ അലറി വിളിച്ച് പറയുന്നുണ്ടായിരുന്നു. വനപാലകന്‍ മരണത്തോട് മല്ലിടുന്ന ദൃശ്യങ്ങളും തടിച്ചുകൂടിയവരില്‍ ഒരുവന്‍ പകര്‍ത്തി.