വീട്ടിലേക്ക് മടങ്ങി വരവേ ബി.ജെ.പി പ്രവര്‍ത്തകനെ ബൈക്കിലെത്തിയ സംഘം കുത്തിക്കൊന്നു. കഴിഞ്ഞ ദിവസം രാത്രി കര്‍ണാടകയിലെ ചിക്കമംഗ്ലൂരിലെ ഗൗരി കനാലിന് സമീപത്ത് വച്ചാണ് സംഭവം നടന്നത്. ചിക്കമംഗ്ലൂര്‍ ബി.ജെ.പി ജനറല്‍ സെക്രട്ടറി മുഹമ്മദ് അന്‍വറാണ് കൊല്ലപ്പെട്ടത്. ബൈക്കിലെത്തിയ സംഘം മൂന്ന് തവണ അന്‍വറിനെ കുത്തി. ഗുരുതരമായി പരുക്കേറ്റ അന്‍വര്‍ സംഭവസ്ഥലത്ത് തന്നെ കൊല്ലപ്പെട്ടതായി പൊലീസ് അറിയിച്ചു. സംഭവത്തില്‍ കേസെടുത്ത പൊലീസ് അന്വേഷണം ആരംഭിച്ചു.

രാഷ്ട്രീയ കൊലപാതകമാണെന്ന് വ്യക്തമാക്കുന്ന തെളിവുകളൊന്നും ഇതുവരെ ലഭിച്ചിട്ടില്ല. വ്യക്തിവിരോധം മൂലമാണ് കൊലപാതകം നടത്തിയതെന്നാണ് പ്രാഥമിക നിഗമനം. സംഭവം നടന്ന സ്ഥലത്തെ സി.സി.ടി.വി കാമറകള്‍ പരിശോധിക്കുന്നുണ്ട്. കുറ്റവാളികളെക്കുറിച്ച് വ്യക്തമായ സൂചന ലഭിച്ചിട്ടുണ്ടെന്നും ഇവരെ ഉടന്‍ തന്നെ അറസ്റ്റ് ചെയ്യുമെന്നും പൊലീസ് അറിയിച്ചു.

അതേസമയം, അന്‍വറിന്റെ കൊലപാതകം പ്രദേശത്ത് സംഘര്‍ഷാവസ്ഥയ്ക്ക് കാരണമായിട്ടുണ്ട്. കൊലപാതകത്തിന് പിന്നില്‍ വന്‍ ഗൂഢാലോചനയുണ്ടെന്ന് പ്രാദേശിക ബി.ജെ.പി നേതൃത്വം ആരോപിക്കുന്നു. കുറ്റവാളികളെ ഉടന്‍ പിടികൂടണമെന്നും ബി.ജെ.പി ആവശ്യപ്പെട്ടു. അടുത്തിടെ പശ്ചിമബംഗാളില്‍ രണ്ട് ബി.ജെ.പി പ്രവര്‍ത്തകര്‍ തൂങ്ങിമരിച്ച നിലയില്‍ കാണപ്പെട്ടത് ദേശീയ തലത്തില്‍ ചര്‍ച്ചയായിരുന്നു.