തിരുവനന്തപുരത്തെ ജനങ്ങള്‍ക്ക് ഏറെ നിര്‍ണ്ണായകമായ തെരഞ്ഞെടുപ്പാണ് നടക്കുന്നതെന്നും അഴിമതി നിറഞ്ഞ തിരുവനന്തപുരം നഗരസഭാ ഭരണം മാറിയാല്‍ മാത്രമേ തലസ്ഥാന നഗരത്തിന് വികസനമുണ്ടാകൂ എന്നും ബിജെപി സംസ്ഥാന അധ്യക്ഷന്‍ ര്‍. നിയമസഭാ തെരഞ്ഞെടുപ്പിന് മുന്നോടിയായുള്ള സെമി ഫൈനലായല്ല ബിജെപി തദ്ദേശ തെരഞ്ഞെടുപ്പിനെ കാണുന്നത്. മറിച്ച്, കേരളത്തിലെ ജനങ്ങള്‍ ആഗ്രഹിക്കുന്ന മാറ്റം കൊണ്ടുവരാനുള്ള അവസരമായാണ്.

തിരുവനന്തപുരം നഗരത്തിന്റെ ഭാവി എന്താവണം, ഏതു ദിശയില്‍ വേണം നഗരത്തിന്റെ മുന്നോട്ടുള്ള വികസനം എന്ന് തീരുമാനിക്കുന്നത് ഈ തെരഞ്ഞെടുപ്പിലാണ്, ശാസ്തമംഗലം സ്ഥാനാര്‍ത്ഥി ആര്‍. ശ്രീലേഖ ഐപിഎസിന്റെ തെരഞ്ഞെടുപ്പ് കണ്‍വന്‍ഷന്‍ ശാസ്തമംഗലം എന്‍എസ്എസ് ഹാളില്‍ ഉദ്ഘാടനം ചെയ്തുകൊണ്ട് രാജീവ് ചന്ദ്രശേഖര്‍ പറഞ്ഞു.

പരമ്പരാഗതമായി തന്നെ തദ്ദേശ തെരഞ്ഞെടുപ്പിലെ വോട്ടിംഗ് ശരാശരി കുറയുന്ന പതിവുണ്ട്. ഇതിന്റെ പ്രയോജനം മുതലാക്കി ചില രാഷ്ട്രീയ പാര്‍ട്ടികള്‍ മുപ്പതും നാല്‍പ്പതും കൊല്ലങ്ങളാണ് തദ്ദേശ സ്ഥാപനങ്ങള്‍ ഭരിച്ച് കുളമാക്കുന്നത്. തുടര്‍ച്ചയായി പതിറ്റാണ്ടുകള്‍ ഭരിച്ചിട്ടും യാതൊന്നും ചെയ്യാത്ത, അഴിമതി നിറഞ്ഞ ഭരണ സംവിധാനങ്ങളാണ് മിക്ക തദ്ദേശ സ്ഥാപനങ്ങളിലും നിലനില്‍ക്കുന്നത്. തിരുവനന്തപുരം നഗരസഭ തന്നെ ഇതിന് ഉദാഹരണമാണ്. ജനങ്ങള്‍ക്ക് യാതൊരു പ്രയോജനവും ലഭിക്കാത്ത ഭരണമാണ് കാലങ്ങളായി ഇവിടെ നടക്കുന്നത്. തലസ്ഥാന നഗരമായ തിരുവനന്തപുരത്തെ ഭരണസംസ്‌ക്കാരത്തില്‍ മാറ്റം വരേണ്ടതുണ്ട്.

തിരുവനന്തപുരം നഗരത്തെ നന്നാക്കാനിറങ്ങിയ 101 പ്രവര്‍ത്തകരാണ് ബിജെപിയുടെ സ്ഥാനാര്‍ത്ഥികളായി മത്സരിക്കുന്നത്. മികവിന്റെ രാഷ്ട്രീയമാണ് ബിജെപി തദ്ദേശ തെരഞ്ഞെടുപ്പില്‍ മുന്നോട്ട് വെയ്ക്കുന്നത്. വികസിത കേരളവും വികസിത തിരുവനന്തപുരവുമാണ് ബിജെപിയുടെ ലക്ഷ്യം.ബിജെപി ഓഫീസുകള്‍ കേന്ദ്രീകരിച്ച് ആരംഭിച്ച ഹെല്‍പ്പ് ഡെസ്‌ക്കുകളില്‍ സഹായം അഭ്യര്‍ത്ഥിച്ചെത്തിയ 38,000 മലയാളികളുടെ പ്രശ്‌നങ്ങളാണ് കഴിഞ്ഞ ആറുമാസംകൊണ്ട് ബിജെപി പരിഹരിച്ചത്. മുന്‍ ഡിജിപി ആര്‍. ശ്രീലേഖയെപ്പോലെ മികവാര്‍ന്ന സ്ഥാനാര്‍ത്ഥികളെയാണ് ബിജെപി ഇത്തവണ നഗരസഭയില്‍ മത്സരിക്കാന്‍ നിയോഗിച്ചിരിക്കുന്നത്. തിരുവനന്തപുരം നഗരത്തിനും നഗരവാസികള്‍ക്കും ആര്‍. ശ്രീലേഖയെപ്പോലെയുള്ളവരുടെ സേവനം ലഭ്യമാക്കാനാണ് ബിജെപിയുടെ ശ്രമമെന്നും രാജീവ് ചന്ദ്രശേഖര്‍ പറഞ്ഞു.