സൗദിയിൽ മകളുടെ വിവാഹത്തിന് നാട്ടിൽ പോകാനുള്ള തയാറെടുപ്പിനിടെ അസീറിൽ മലയാളിയെ തൂങ്ങിമരിച്ച നിലയിൽ കണ്ടെത്തി. മഞ്ചേരി താണിപ്പാടം സ്വദേശി ഉള്ളാട്ടിൽ അഷ്‌റഫ് എന്ന അഷ്‌റഫ് അബോണയാണ് (52) മരിച്ചത്​.

ഖമീസ് മുശൈത്ത് ന്യു സനാഇയ്യയിലെ ചോക്കലേറ്റ് വെയർ ഹൗസിലാണ്​ മൃതദേഹം കണ്ടെത്തിയത്. ഖമീസ് അസ്മ ട്രേഡിംഗ് എസ്​റ്റാബ്ലിഷ്‌മെന്റ് ചോക്കലേറ്റ് വിതരണ കമ്പനിയിൽ മാനേജർ ആയിരുന്നു ഇദ്ദേഹം. മകളുടെ വിവാഹത്തിന് നാട്ടിൽ പോകാനുള്ള തയാറെടുപ്പിനിടെയാണ്​ സംഭവം. ശനിയാഴ്​ച രാത്രി 11 മണിയോടെയാണ്​ മരിച്ച നിലയിൽ കണ്ടത്​.

ഉള്ളാട്ടിൽ അലവിയാണ് പിതാവ്. ഭാര്യ ലൈല. മക്കൾ നാമിയ, സനാൻ, സിയ, ഇഷ. മൃതദേഹം നാട്ടിൽ കൊണ്ടു പോകാനുള്ള നിയമ നടപടികൾ കമ്പനി സ്പോൺസറുടെ നേതൃത്വത്തിൽ പുരോഗമിക്കുന്നു. ഭാര്യാസഹോദരൻ അനീർ, കെ.എം.സി.സി നേതാക്കളായ ജമാൽ കടവ്, ബഷീർ മൂന്നിയൂർ എന്നിവർ നിയമനടപടികൾക്ക്​ സഹായത്തിനുണ്ട്​.