സൗദിയില്‍ സ്‌കൂള്‍ ഫീസ് വര്‍ധനയെ കുറിച്ച് പഠിക്കാന്‍ പ്രത്യേക സമിതി രൂപീകരിക്കും. സമിതിയുടെ റിപ്പോര്‍ട്ടിനനുസരിച്ച് അടുത്ത അധ്യയന വര്‍ഷം മുതല്‍ ഇതുസംബന്ധമായ നിര്‍ദേശങ്ങള്‍ പ്രാബല്യത്തില്‍ വരും.
സ്വകാര്യ സ്‌കൂളുകളും ഇന്റര്‍നാഷണല്‍ സ്‌കൂളുകളും അടുത്ത അധ്യയന വര്‍ഷം മുതല്‍ ട്യൂഷന്‍ ഫീസ് വര്‍ധിപ്പിക്കാനിരിക്കെയാണ് വിദ്യാഭ്യാസ മന്ത്രാലയത്തിന്റെ ഈ തീരുമാനം. ഫീസ് വര്‍ധനയ്‌ക്കെതിരെ രക്ഷിതാക്കളില്‍ നിന്നും ലഭിച്ച തുടര്‍ച്ചയായ പരാതികളെ തുടര്‍ന്നാണ് അധികൃതര്‍ ഇടപെടുന്നത്. ഫീസ് വര്‍ധനയെക്കുറിച്ച് പഠിക്കാന്‍ പ്രത്യേക സമിതിയെ നിയോഗിക്കാന്‍ വിദ്യാഭ്യാസ മന്ത്രി അസ്സാം അല്‍ ദകീല്‍ ഉത്തരവിട്ടു. ഓരോ പ്രവിശ്യയില്‍ പ്രത്യേകം സമിതികള്‍ രൂപീകരിക്കാനാണ് നിര്‍ദേശം. സമിതിയുടെ പഠന റിപ്പോര്‍ട്ടിനനുസരിച്ചു അടുത്ത അധ്യയനവര്‍ഷം മുതല്‍തന്നെ ഇതുസംബന്ധമായ തീരുമാനം പ്രാബല്യത്തില്‍ കൊണ്ടുവരും.
വിദ്യാഭ്യാസ മന്ത്രാലയത്തിന്റെ മുന്‍കൂട്ടിയുള്ള അനുമതി ഇല്ലാതെ ഫീസ് വര്‍ധിപ്പിക്കരുതെന്നു നേരത്തെ സ്‌കൂളുകള്‍ക്ക് നിര്‍ദേശം നല്‍കിയിരുന്നു. അധ്യാപകരുടെ ശമ്പള വര്‍ധന ഉള്‍പ്പെടെ ചെലവുകള്‍ ഉള്ളതിനാല്‍ ഫീസ് വര്‍ധന അനിവാര്യമാണ് എന്നാണു പല സ്‌കൂളുകളുടെയും നിലപാട്. ചില ഇന്ത്യന്‍ സ്‌കൂളുകളും അടുത്ത അധ്യയന വര്ഷം മുതല്‍ ഫീസ് വര്‍ധിപ്പിക്കാന്‍ തീരുമാനിച്ചിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha