മലയാളികളുടെ പ്രിയപ്പെട്ട നടനാണ് ദിലീപ്. ഒരു സാധാരണ മിമിക്രി കലാകാരനില്‍ നിന്ന് ഉയരങ്ങള്‍ കീഴടക്കി മലയാളസിനിമയുടെ മുന്‍ നിരയിലെത്താന്‍ ദിലീപിന് അധികം കാല താമസം വേണ്ടി വന്നില്ല. ഒരുകാലത്ത് മമ്മൂട്ടി, മോഹന്‍ലാല്‍, സുരേഷ് ഗോപി, ജയറാം, ദിലീപ് എന്നിവരായിരുന്നു മലയാള സിനിമയുടെ അമരക്കാരായിരുന്നത്. സൂപ്പര്‍ താര ചിത്രങ്ങള്‍ പലതും നിലം പൊത്തിയപ്പോഴും പ്രേക്ഷകരെ, പ്രത്യേകിച്ച് കുടുംബപ്രേക്ഷകരെ തിയേറ്ററുകളിലെത്തിച്ചതിന് ദിലീപ് ചിത്രങ്ങള്‍ക്ക് വലിയ പങ്കുണ്ട്. കഴിഞ്ഞ കുറച്ച് കാലങ്ങളായി നിരവധി വിവാദങ്ങളിലൂടെ താരത്തിന് കടന്നുപോകേണ്ടി വന്നുവെങ്കിലും ദിലീപെന്ന നടനെ സ്‌നേഹിക്കുന്നവര്‍ നിരവധിയാണ്.

ഇന്ന് ജനപ്രിയ നായകൻ ദിലീപിന്റെ 59-ാം പിറന്നാൾ ദിനമാണ്. ദിലീപിന് പിറന്നാൾ ആശംസകൾ നേർന്ന് നാദിർഷ പങ്കുവച്ച കുറിപ്പാണ് ഇപ്പോൾ സോഷ്യൽമീഡിയയിൽ ശ്രദ്ധ നേടുന്നത്. പതിനാറാം വയസ്സിൽ തുടങ്ങിയ സൗഹൃദമാണിതെന്നും അന്നും എന്നും ഇനി എന്നും കൂടെ തന്നെ ഉണ്ടാകുമെന്നുമാണ് നാദിർഷ പറഞ്ഞത്. ദിലീപിനൊപ്പമുള്ള ചിത്രം പങ്കുവച്ചുകൊണ്ടായിരുന്നു നാദിർഷ കുറിപ്പ് പങ്കുവെച്ചത്.

‘‘പതിനാറാം വയസ്സിൽ തുടങ്ങിയ സൗഹൃദമാണ് നമ്മൾ തമ്മിൽ. എനിക്ക് നിന്നെ പരിപൂർണ വിശ്വാസമാണ്. അതുകൊണ്ട് ഞാൻ നിന്റെ കൂടെ നിൽക്കുന്നു. അന്നും ഇന്നും ഇനി എന്നും. പിറന്നാൾ ആശംസകൾ പ്രിയപ്പെട്ട നൻപാ.’’– എന്നായിരുന്നു നാദിർഷയുടെ വാക്കുകൾ.

മിമിക്രി വേദികളിലൂടെ ആരംഭിച്ച ദിലീപ് - നാദിർഷ സൗഹൃദം മലയാള ചലച്ചിത്ര ലോകത്തെ ഏറ്റവും ശക്തമായ ആത്മബന്ധങ്ങളിലൊന്നാണ്. 'ദേ മാവേലി കൊമ്പത്ത്' എന്ന സൂപ്പർഹിറ്റ് ഓഡിയോ ആൽബം പരമ്പരയിലൂടെ പ്രേക്ഷകശ്രദ്ധ നേടിയ ഇരുവരും, 'ദേ പുട്ട്' പോലുള്ള ബിസിനസ് സംരംഭങ്ങളിലൂടെയും സിനിമകളിലൂടെയും മൂന്ന് പതിറ്റാണ്ടിലേറെയായി ആ സൗഹൃദം ഒരേ ഊഷ്മളതയോടെ നിലനിർത്തുന്നു.

സംവിധായകൻ കമലിന്റെ സഹസംവിധായകനായി സിനിമാ ജീവിതം ആരംഭിച്ച ദിലീപ്, ചെറിയ വേഷങ്ങളിലൂടെ അഭിനയരംഗത്തേക്ക് കടന്നുവന്ന് പിന്നീട് മലയാള സിനിമയിലെ "ജനപ്രിയ നായകനായി" മാറുകയായിരുന്നു. മികച്ച കോമഡി ടൈമിംഗും കുടുംബപ്രേക്ഷകർക്ക് പ്രിയപ്പെട്ട കഥാപാത്രങ്ങളുമാണ് ദിലീപ് എന്ന നടനെ ഇൻഡസ്ട്രിയിൽ വേറിട്ടുനിർത്തുന്നത്.