തമിഴ്‌നാട് തേനി ആണ്ടിപ്പെട്ടിയിലെ ജില്ലാ ജയിലിൽ സുരക്ഷാ ജീവനക്കാരെ അതിക്രൂരമായി ആക്രമിച്ച് 17 വിചാരണ തടവുകാർ കൂട്ടത്തോടെ ജയിൽ ചാടി. തടവുകാരിലൊരാൾ അപസ്മാരം ബാധിച്ചതായി അഭിനയിച്ച് സെല്ലിന്റെ പൂട്ട് തുറപ്പിക്കുകയും, അകത്തുകയറിയ ജീവനക്കാരെ പാചകപ്പുരയിലെ വലിയ തവികൾ ഉപയോഗിച്ച് തല്ലിച്ചതയ്ക്കുകയുമായിരുന്നു. ആക്രമണത്തിൽ ഗുരുതരമായി പരുക്കേറ്റ ഗ്രേഡ്-II കോൺസ്റ്റബിൾ തങ്കപ്പാണ്ടി ഉൾപ്പെടെയുള്ള ഉദ്യോഗസ്ഥരെ ആശുപത്രിയിൽ പ്രവേശിപ്പിച്ചു. സംഭവം നടന്ന് മണിക്കൂറുകൾക്കകം പ്രവീൺ, ചിലമ്പരശൻ, രാജ്കുമാർ, രാജ സിക്കന്ദർ എന്നീ നാല് പ്രതികളെ പൊലീസ് പിടികൂടിയെങ്കിലും ബാക്കിയുള്ള 13 പേർക്കായി തെരച്ചിൽ ഊർജ്ജിതമാക്കിയിരിക്കുകയാണ് . ദക്ഷിണ മേഖലാ ഐജി വിജയേന്ദ്ര ബിദാരിയുടെ നേതൃത്വത്തിൽ 17 പ്രത്യേക അന്വേഷണ സംഘങ്ങളാണ് രംഗത്തുള്ളത്. പ്രതികൾ കാട്ടുപാതകൾ വഴി കേരളത്തിലേക്ക് കടക്കാൻ സാധ്യതയുള്ളതിനാൽ ഇടുക്കി കമ്പംമെട്ട്, ബോഡിമെട്ട് തുടങ്ങിയ അതിർത്തി ചെക്ക് പോസ്റ്റുകളിൽ കേരള പൊലീസും വൻ വാഹന പരിശോധനയും നിരീക്ഷണവും ശക്തമാക്കിയിട്ടുണ്ട്.