ചേരാനല്ലൂര്‍ അപകടത്തില്‍ പ്രതിയായ 17കാരന്റെ മൊഴികളില്‍ നിരവധി പൊരുത്തക്കേടുകള്‍ ഉണ്ടെന്നാണ് അന്വേഷണസംഘം പറയുന്നത്. ഓടിക്കാനുള്ള ആഗ്രഹം കൊണ്ടാണ് ബെന്‍സ് എടുത്തിറങ്ങിയതെന്നും യൂട്യൂബ് നോക്കിയാണ് വാഹനം ഓടിക്കാന്‍ പഠിച്ചതെന്നുമാണ് കുട്ടി അന്വേഷണസംഘത്തോട് പറഞ്ഞത്. എന്നാല്‍ അന്വേഷണസംഘം ഇത് വിശ്വാസത്തിലെടുത്തിട്ടില്ല.

ചേരാനല്ലൂരില്‍ ഞായറാഴ്ച പുലര്‍ച്ചെ രണ്ടേകാലിനും രണ്ടരയ്ക്കുമിടയിലാണ് അപകടമുണ്ടായത്. സ്‌കൂട്ടര്‍ യാത്രക്കാരനായ സൗത്ത് ചിറ്റൂര്‍ നെല്ലുവേലില്‍ പുത്തന്‍പറമ്പില്‍ വീട്ടില്‍ ജയബാലകൃഷ്ണനാണ് (55) മരിച്ചത്. ചിറ്റൂര്‍ ക്ഷേത്രത്തിന് സമീപം തട്ടുകട നടത്തുകയായിരുന്നു ഇദ്ദേഹം.

ഇതിന് മുന്‍പും 17കാരന്‍ വാഹനം ഓടിച്ചിട്ടുണ്ടെന്നതിന്റെ തെളിവുകള്‍ ഇന്‍സ്റ്റഗ്രാം അക്കൗണ്ടില്‍ ഉണ്ടായിരുന്നു. എന്നാല്‍ അപകടത്തിന് പിന്നാലെ ഈ തെളിവുകള്‍ ഇന്‍സ്റ്റഗ്രാമില്‍ നിന്ന് ഡിലീറ്റ് ചെയ്തതായി അന്വേഷണസംഘം കണ്ടെത്തി. കാര്‍ ഓടിച്ച സമയത്ത് റൈഡിന്റെ ദൃശ്യങ്ങള്‍ 17കാരന്‍ സ്വന്തം ഫോണില്‍ പകര്‍ത്തിയിരുന്നു. ഈ വീഡിയോകളില്‍ 104 കിലോമീറ്ററോളം വേഗത്തിലാണ് വാഹനം ഓടിച്ചതെന്ന് വ്യക്തമായിട്ടുണ്ട്. 2012 മോഡല്‍ കറുത്ത ബെന്‍സ് കാര്‍ 2022ലാണ് ജഡ്ജി വാങ്ങിയതെന്നാണ് റിപ്പോര്‍ട്ട്.

17കാരനെതിരെ നരഹത്യയ്ക്ക് കേസെടുത്തിരുന്നു. പ്രായപൂര്‍ത്തിയാകാത്ത മകന് വാഹനം ഓടിക്കാന്‍ നല്‍കിയതിന് മോട്ടോര്‍ വാഹന നിയമത്തിലെ വ്യവസ്ഥകള്‍ പ്രകാരം ആര്‍സി ഉടമയായ ജഡ്ജിയെയും കേസിലെ പ്രതിപ്പട്ടികയില്‍ ഉള്‍പ്പെടുത്തിയിട്ടുണ്ട്. കേസ് ജില്ലാ ക്രൈംബ്രാഞ്ച് അന്വേഷിക്കും.