സൗദി അറേബ്യയിലേക്കുള്ള വിമാന സര്‍വീസുകള്‍ക്ക് നിയന്ത്രണം നീട്ടി എയര്‍ ഇന്ത്യയും എയര്‍ ഇന്ത്യ എക്‌സ്പ്രസും. പശ്ചിമേഷ്യയില്‍ സംഘര്‍ഷാവസ്ഥ രൂക്ഷമാകുന്ന സാഹചര്യത്തിലാണ് തീരുമാനം. റിയാദ്, ദമാം നഗരങ്ങളിലേക്കും തിരിച്ചുമുള്ള സര്‍വീസുകള്‍ നവംബര്‍ 7 വരെയും ജിദ്ദയിലേക്കും തിരിച്ചുമുള്ള സര്‍വീസുകള്‍ ഒക്ടോബര്‍ 31 വരെയും റദ്ദാക്കിയതായി വിമാനക്കമ്പനികള്‍ അറിയിച്ചു.

ഇന്‍ഡിഗോ, ആകാശ എയര്‍ തുടങ്ങിയ വിമാനക്കമ്പനികളും സൗദിയിലേക്കുള്ള സര്‍വീസുകള്‍ വെട്ടിക്കുറച്ചിട്ടുണ്ട്. വിമാനങ്ങള്‍ റദ്ദാക്കിയതോടെ യാത്രക്കാരും ഉംറ തീര്‍ത്ഥാടകരും ഉള്‍പ്പെടെ നിരവധി പേരാണ് പ്രതിസന്ധിയിലായത്. യാത്ര മുടങ്ങിയ ഇന്ത്യക്കാര്‍ക്ക് സഹായം ഉറപ്പാക്കാന്‍ ജിദ്ദയിലെ ഇന്ത്യന്‍ കോണ്‍സുലേറ്റ് നടപടികള്‍ ശക്തമാക്കിയിട്ടുണ്ട്.

നിലവിലെ സാഹചര്യങ്ങള്‍ കണക്കിലെടുത്താണ് സര്‍വീസുകള്‍ റദ്ദാക്കാനുള്ള തീരുമാനം നീട്ടിയതെന്ന് എയര്‍ ഇന്ത്യ എക്‌സിലൂടെ അറിയിച്ചു. ഒക്ടോബര്‍ 24നോ അതിനു മുമ്പോ ടിക്കറ്റ് സ്ഥിരീകരിച്ച യാത്രക്കാര്‍ക്ക് സൗജന്യമായി യാത്ര പുനഃക്രമീകരിക്കുകയോ ടിക്കറ്റ് റദ്ദാക്കി മുഴുവന്‍ തുകയും തിരിച്ചുവാങ്ങുകയോ ചെയ്യാം. റിയാദ്, ദമാം നഗരങ്ങളിലേക്ക് നവംബര്‍ ഏഴ് വരെയുള്ള തീയതികളില്‍ യാത്ര നിശ്ചയിച്ചിട്ടുള്ള എയര്‍ ഇന്ത്യ യാത്രക്കാര്‍ക്ക് സൗദി അറേബ്യയിലെ സര്‍വീസ് നടത്തുന്ന മറ്റേതെങ്കിലും എയര്‍ ഇന്ത്യ സ്‌റ്റേഷനില്‍നിന്ന് യാത്ര പുനഃക്രമീകരിക്കാം. സീറ്റുകളുടെ ലഭ്യതയ്ക്ക് അനുസരിച്ച് ഒറ്റത്തവണ സൗജന്യ ബുക്കിംഗ് അനുവദിക്കും. നവംബര്‍ 21 വരെയുള്ള യാത്രകള്‍ക്കാണ് ഈ സൗകര്യം.

ജിദ്ദയിലേക്കും തിരിച്ചുമുള്ള യാത്രകള്‍ക്ക് ഒക്ടോബര്‍ 31 വരെയുള്ള ടിക്കറ്റുകള്‍ എടുത്തവര്‍ക്കും സമാനമായ സൗകര്യമുണ്ട്. നവംബര്‍ 14 വരെയുള്ള യാത്രകള്‍ക്കായി ടിക്കറ്റ് പുനഃക്രമീകരിക്കാം. എയര്‍ ഇന്ത്യ എക്‌സ്പ്രസും സമാനമായ ആനുകൂല്യങ്ങള്‍ പ്രഖ്യാപിച്ചിട്ടുണ്ട്.