ആ കാഴ്ച കാണാനാവാതെ.... യുകെയിലെ നഴ്‌സിന്റെയും മക്കളുടെയും മൃതദേഹങ്ങള്‍ അന്ത്യാജ്ഞലി അര്‍പ്പിക്കാന്‍ നാടൊന്നാകെ ഒഴുകിയെത്തി.... സംസ്‌കാര ചടങ്ങുകള്‍ നടന്നു, അഞ്ജുവിന്റെയും മക്കളുടെയും കൊലപാതകക്കേസ് അന്വേഷണത്തിനായി നോര്‍താംപ്റ്റന്‍ഷര്‍ പൊലീസ് ഈയാഴ്ച വൈക്കത്തെത്തും. അഞ്ജുവിന്റെ താലിയും സ്വര്‍ണാഭരണങ്ങളും പിതാവ് അശോകന്‍ യുകെയില്‍ നിന്നു മൃതദേഹങ്ങള്‍ക്കൊപ്പം എത്തിയ മനോജ് മാത്യുവില്‍ നിന്ന് ഏറ്റുവാങ്ങിയതു വേദന നിറഞ്ഞ കാഴ്ചയായി, അഞ്ജുവിന്റെ സഹപ്രവര്‍ത്തകനാണു മനോജ്.


അതേസമയം അവിടെ നിന്നും കൊണ്ടു വന്ന് ആ രണ്ടു കുഞ്ഞുപെട്ടികളില്‍ നിറയെ കുട്ടിയുടുപ്പുകളും കളിപ്പാട്ടങ്ങളുമായിരുന്നു. പേരെഴുതിയ ബാഗും നെയിംസ്ലിപ് ഒട്ടിച്ച പുസ്തകങ്ങളും പിങ്ക് നിറത്തിലുള്ള കുടയും വാട്ടര്‍ ബോട്ടിലുമെല്ലാം അതിനോടു ചേര്‍ത്തുവച്ചിരുന്നു. അവയ്‌ക്കൊപ്പം രണ്ടു കുഞ്ഞുങ്ങള്‍ ഒന്നുമറിയാതെ ഉറക്കത്തിലായിരുന്നു. അമ്മയുടെ ഉറക്കത്തിനരികിലായി അവരുടെയും കുഞ്ഞുറക്കം. പലരു ം ആ കാഴ്ച കണ്ട് കണ്ണീരൊഴുക്കി. യുകെയില്‍ നഴ്‌സായ അഞ്ജു (40), മക്കളായ ജീവ (6), ജാന്‍വി (4) എന്നിവരുടെ മൃതദേഹം ഇന്നലെയാണു ജന്മനാട്ടില്‍ എത്തിച്ചത്. ഇവരെ കൊല്ലപ്പെട്ട നിലയില്‍ ലണ്ടനിലെ വീട്ടില്‍ കണ്ടെത്തിയതു ഡിസംബര്‍ 15നാണ്. കൊലക്കേസില്‍ അഞ്ജുവിന്റെ ഭര്‍ത്താവ് കണ്ണൂര്‍ ഇരിട്ടി പടിയൂര്‍ കൊമ്പന്‍പാറ ചേലപാലന്‍ സാജു(52)വിനെ പൊലീസ് അറസ്റ്റ് ചെയ്തിരുന്നു.

യുകെയിലെ കോടതിയില്‍ കുറ്റസമ്മതം നടത്തിയ സാജു നോര്‍താംപ്റ്റന്‍ഷര്‍ പൊലീസിന്റെ കസ്റ്റഡിയിലാണ്. കുലശേഖരമംഗലം അറയ്ക്കല്‍ അശോകന്റെ മകളാണ് അഞ്ജു. വിദേശകാര്യ മന്ത്രാലയത്തിന്റെ ഇടപെടലിനെത്തുടര്‍ന്നു വിമാനക്കൂലി ഈടാക്കാതെയാണു 3 പേരുടെയും മൃതദേഹങ്ങള്‍ നാട്ടിലെത്തിച്ചത്.

ഇത്തിപ്പുഴയിലെ വീട്ടില്‍ പൊതുദര്‍ശനത്തിനു വച്ചപ്പോള്‍ മൂവര്‍ക്കും അന്ത്യാഞ്ജലിയര്‍പ്പിക്കാന്‍ നാടൊന്നാകെ ഒഴുകിയെത്തി. ഉച്ചയോടെ മൃതദേഹങ്ങള്‍ വീട്ടുവളപ്പില്‍ സംസ്‌കരിച്ചു.

അതേ സമയം അഞ്ജുവിന്റെയും മക്കളുടെയും സംസ്‌കാരം നടത്തിയ ഇന്നലെ യുകെയിലെ ജയിലില്‍ സാജു ജീവനൊടുക്കാന്‍ ശ്രമിച്ചുവെന്നും തുടര്‍ന്ന് ആശുപത്രിയില്‍ ചികിത്സയിലാണെന്നും ലണ്ടനിലെ മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. എന്നാല്‍ ഇക്കാര്യം അധികൃതര്‍ സ്ഥിരീകരിച്ചിട്ടില്ല. ഭാര്യയെയും മക്കളെയും കൊലപ്പെടുത്തിയ ദിവസവും സാജു ജീവനൊടുക്കാന്‍ ശ്രമിച്ചിരുന്നതായി പൊലീസ് നിഗമനം.