വാഹനാപകടത്തില്‍ പരിക്കേറ്റ മലയാളി യുവാവിന് 1.70 കോടി രൂപ നഷ്ടപരിഹാരം
വാഹനാപകടത്തില്‍ പരിക്കേറ്റ മലയാളി യുവാവിന് പത്ത് ലക്ഷം ദിര്‍ഹം (1.70 കോടി രൂപ) നഷ്ടപരിഹാരമായി നല്കാന്‍ ദുബായ് കോടതി വിധിച്ചു.
കണ്ണൂര്‍ പുതിയങ്ങാടി കുണ്ടപ്പന്‍ വീട്ടില്‍ കബീര്‍ (44) കഴിഞ്ഞവര്‍ഷം മാര്‍ച്ച് ഒന്നിന് അബുദാബിയില്‍ നിന്ന് ഫുജൈറയിലേക്ക് പോകുന്ന വഴിയാണ് അപകടത്തില്‍പ്പെട്ടത്. കബീര്‍ സഞ്ചരിച്ച കാര്‍ തലകീഴായി മറിയുകയായിരുന്നു. കൂടെയുണ്ടായിരുന്ന യുവാക്കള്‍ സീറ്റ് ബെല്‍റ്റ് ധരിച്ചതുകാരണം പരിക്കില്ലാതെ രക്ഷപ്പെട്ടു. നട്ടെല്ലിന് കാര്യമായ ക്ഷതമേറ്റ കബീറിനെ ശസ്ത്രക്രിയയ്ക്ക് വിധേയനാക്കി. മൂന്ന് മാസത്തോളം ദുബായ് റാഷിദ് ആസ്പത്രിയില്‍ കിടന്നു. മൂന്ന് മാസത്തെ ചികിത്സയ്ക്ക് ശേഷം നാട്ടിലേക്കുപോയ കബീര്‍ ഇപ്പോള്‍ കോയമ്പത്തൂരിലെ സ്വകാര്യാസ്പത്രിയില്‍ ചികിത്സയിലാണ്.
ഇരുപത് ലക്ഷം ദിര്‍ഹമാണ് കബീറിനുവേണ്ടി നഷ്ടപരിഹാരത്തിനായി കേസ് ഫയല്‍ ചെയ്തത്. ഇതിലാണ് ദുബായ് കോടതി പത്ത് ലക്ഷം ദിര്‍ഹവും ഒന്‍പത് ശതമാനം പലിശയും നഷ്ടപരിഹാരമായി നല്കാന്‍ എതിര്‍കക്ഷിയായ സഖര്‍ നാഷണല്‍ ഇന്‍ഷുറന്‍സ് കമ്പനിക്ക് നിര്‍ദേശം നല്കിയത്.
https://www.facebook.com/Malayalivartha
