സലാല എയറിന്റെ ആദ്യ സര്‍വീസ് ജൂലൈ 23ന് മുമ്പ് തുടക്കം കുറിക്കും. ഒമാനില്‍ നിന്നുള്ള മൂന്നാമത്തെ വിമാന കമ്പനിയാണ് സലാല എയര്‍. ആദ്യ ഘട്ടത്തില്‍ ആഭ്യന്തര സര്‍വീസ് മാത്രമാണ് സലാല എയര്‍ ലക്ഷ്യം വയ്ക്കുന്നത്. മസ്‌കത്ത്, സലാല അന്താരാഷ്ട്ര വിമാനത്താവളങ്ങളും സുഹാര്‍, ദുകം ആഭ്യന്തര വിമാനത്താവളങ്ങളുമാണ് രാജ്യത്ത് ഇപ്പോള്‍ പ്രവര്‍ത്തിക്കുന്നത്.

രണ്ടാം ഘട്ടത്തില്‍ ജി സി സി രാഷ്ട്രങ്ങളിലേക്കും മിഡില്‍ ഈസ്റ്റ്, ആഫ്രിക്ക മേഖലയിലേക്കും സര്‍വീസ് നടത്തുമെന്നും സലാല എയര്‍ അധികൃതര്‍ വ്യക്തമാക്കി. ഒമാന്റെ ദേശീയ നവോത്ഥാന ദിനമായ ജൂലൈ 23ന് മുമ്പ് സര്‍വീസ് ആരംഭിക്കുന്നതിനുള്ള നടപടികളാണ് സ്വീകരിച്ച് വരുന്നത്. രാജ്യത്തെ ഓരോ മേഖലയിലേയും ജനസംഖ്യാ നിരക്ക്, ബസ് സമയങ്ങള്‍ എന്നിവ പരിശോധിച്ച് വരികയാണ്. ഇതനുസരിച്ചാണ് റൂട്ടുകളും സര്‍വീസ് സമയങ്ങളും ക്രമീകരിക്കുക. ഒരു മാസത്തിനകം ഷെഡ്യൂളുകള്‍ പ്രഖ്യാപിക്കും.