ചര്‍ച്ചയ്ക്ക് തയാറെന്ന് ഖത്തര്‍... ഖത്തര്‍ പ്രതിസന്ധി പരിഹരിക്കാനുള്ള ചര്‍ച്ചകള്‍ക്കായി കുവൈത്ത് അമീര്‍ ഷെയ്ഖ് സബാഹ് അല്‍ അഹമ്മദ് അല്‍ ജാബര്‍ ദുബായിലെത്തി
ഖത്തര്‍ പ്രതിസന്ധി പരിഹരിക്കാനുള്ള ചര്‍ച്ചകള്‍ക്കായി കുവൈത്ത് അമീര്‍ ഷെയ്ഖ് സബാഹ് അല്‍ അഹമ്മദ് അല്‍ ജാബര്‍ അല്‍ സബാഹ് ദുബായിലെത്തി. സൗദി ഭരണാധികാരി സല്‍മാന്‍ രാജാവുമായുള്ള കൂടിക്കാഴ്ചയ്ക്കു പിന്നാലെയാണു യുഎഇ നേതൃത്വത്തെ കണ്ടത്.
അതിനു മുന്‍പ്, ഒമാന്‍ വിദേശകാര്യമന്ത്രി യൂസഫ് ബിന്‍ അലാവി കുവൈത്തിലെത്തി അമീറുമായി ചര്‍ച്ച നടത്തി. ചര്‍ച്ചയ്ക്കു തയാറാണെന്നു ഖത്തര്‍ വിദേശകാര്യ മന്ത്രി ഷെയ്ഖ് മുഹമ്മദ് ബിന്‍ അബ്ദുല്‍റഹ്മാന്‍ അല്‍താനി അറിയിച്ചതും ശുഭസൂചനയായി. ഖത്തറില്‍ ജനജീവിതം സാധാരണനിലയിലാണ്.
യുഎസ് പ്രസിഡന്റ് ഡോണള്‍ഡ് ട്രംപ് സൗദി ഭരണാധികാരി സല്‍മാന്‍ രാജാവുമായും ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍താനിയുമായും ഫോണില്‍ ചര്‍ച്ച നടത്തി. ഭീകരവാദത്തെ നേരിടാന്‍ ഗള്‍ഫ് സഹകരണ കൗണ്‍സില്‍ (ജിസിസി) ഐക്യത്തോടെ നിലകൊള്ളണമെന്നു സല്‍മാന്‍ രാജാവിനോടു ട്രംപ് അഭിപ്രായപ്പെട്ടതായി വൈറ്റ് ഹൗസ് അറിയിച്ചു.
പ്രശ്‌നം പരിഹരിക്കാന്‍ ഇടപെടാന്‍ സന്നദ്ധമാണെന്നു ഷെയ്ഖ് തമീമിനോടും പറഞ്ഞു. ഖത്തര്‍ പ്രതിരോധമന്ത്രിയുമായി യുഎസ് പ്രതിരോധ സെക്രട്ടറി ജയിംസ് മാറ്റിസും ഫോണില്‍ ചര്‍ച്ച നടത്തി.
പുറത്തുനിന്നു സഹായം വേണ്ടെന്നും ഗള്‍ഫ് രാജ്യങ്ങള്‍ തന്നെ പ്രശ്‌നം കൈകാര്യം ചെയ്തുകൊള്ളാമെന്നും സൗദി വിദേശകാര്യമന്ത്രി ആദില്‍ അല്‍ ജുബൈര്‍ പറഞ്ഞു. ഖത്തറിനെതിരെ നടപടി കൈക്കൊണ്ടതു വളരെ വേദനയോടെയാണെന്നും വ്യക്തമാക്കി.
അതേസമയം, പെരുന്നാളിനു മുന്‍പു പ്രതിസന്ധി പരിഹരിക്കാന്‍ ലക്ഷ്യമിട്ടുള്ള നീക്കങ്ങള്‍ക്കിടയിലും സൗദിയും യുഎഇയും ബഹ്‌റൈനും കര്‍ശന നിലപാടില്‍ അയവു വരുത്തിയിട്ടില്ല. സമൂഹ മാധ്യമങ്ങളിലൂടെയോ, മറ്റേതെങ്കിലും ആശയവിനിമയ മാര്‍ഗങ്ങളിലൂടെയോ ഖത്തറിനോട് അനുഭാവമോ, ചായ്‌വോ പ്രകടിപ്പിച്ചാല്‍ കടുത്ത ശിക്ഷ നേരിടേണ്ടിവരുമെന്നു യുഎഇ മുന്നറിയിപ്പു നല്‍കി.
മൂന്നു മുതല്‍ 15 വര്‍ഷം വരെ ജയില്‍ ശിക്ഷയും അഞ്ചുലക്ഷം ദിര്‍ഹ(ഏകദേശം 87.5 ലക്ഷംരൂപ)ത്തില്‍ കുറയാത്ത പിഴയുമാണു ശിക്ഷ. യുഎഇയിലെ ഖത്തര്‍ എയര്‍വേയ്‌സ് ഓഫിസുകള്‍ പൂട്ടി. ഖത്തര്‍ വീസയുള്ളവരുടെ വീസ ഓണ്‍ അറൈവല്‍ സൗകര്യവും പിന്‍വലിച്ചു.
സെനഗലും കോമറോസും ഖത്തര്‍ സ്ഥാനപതിയെ തിരിച്ചുവിളിച്ചു. ജോര്‍ദാന്‍ നയതന്ത്രബന്ധം പരിമിതപ്പെടുത്തി.
ഭീകരതയെ സഹായിക്കുന്നതിനെ ഗള്‍ഫ് ഒറ്റക്കെട്ടായി നേരിടണമെന്നു ഡോണള്‍ഡ് ട്രംപ് അഭിപ്രായപ്പെട്ടു. തന്റെ ഇടപെടലാണു ഖത്തറിനെതിരെയുള്ള നടപടിക്കു വഴിതെളിച്ചതെന്ന ട്വീറ്റ് വിവാദമായതിനു പിന്നാലെയാണ്, ഒരു രാജ്യത്തിന്റെയും പേരെടുത്തു പറയാതെയുള്ള പ്രസ്താവന.
https://www.facebook.com/Malayalivartha
