അമേരിക്കയുടെ ഭീഷണിയെ തുടര്‍ന്ന് മറ്റ് സഹോദര രാഷ്ട്രങ്ങള്‍ ഖത്തറിനെ കുറ്റപ്പെടുത്തുമ്പോഴും തോറ്റ് പിന്‍മാറാന്‍ അവര്‍ തയ്യാറല്ല. തങ്ങളെ കുറ്റപ്പെടുത്തുന്ന നയങ്ങള്‍ തെറ്റെന്നാണ് ഖത്തറിന്റെ വാദം.

ഇസ്രായേലിനെ എതിര്‍ക്കുന്ന പാലസ്തീനികളുടെ സംഘടനയായ ഹമാസ് തീവ്രവാദികളല്ലെന്നും പ്രതിരോധ മുന്നേറ്റമാണെന്നുമാണ് ഖത്തറിന്റെ വെളിപ്പെടുത്തല്‍. തീവ്രവാദത്തിന് പിന്തുണ നല്‍കുന്നെന്ന് ആരോപിച്ച് ഗള്‍ഫ് രാജ്യങ്ങളില്‍ നിന്നും കനത്ത എതിര്‍പ്പ് നേരിടുമ്പോഴും നിലപാടില്‍ മാറ്റം വരുത്താതെ ഖത്തര്‍. ഇസ്രായേല്‍ എതിര്‍ക്കുന്ന ഹമാസിനെ ന്യായീകരിക്കുന്ന നിലപാടില്‍ ഖത്തര്‍ ഉറച്ചു നിന്നു.

അതേസമയം ഹമാസിനെ തങ്ങള്‍ സഹായിക്കുന്നു എന്ന് തുറന്നുപറയാന്‍ ഖത്തര്‍ തയ്യാറായില്ല. പകരം തങ്ങള്‍ സഹായിക്കുന്നത് പലസ്തീന്‍ ജനതയെ മാത്രമാണെന്നും ഖത്തറില്‍ ഹമാസിന് സാന്നിധ്യമുണ്ട് എന്നതു കൊണ്ട് ഖത്തര്‍ ഹമാസിനെ പിന്തുണയ്ക്കുന്നു എന്ന് അര്‍ത്ഥമില്ലെന്നും. ഖത്തര്‍ സഹായിക്കുന്ന 12 സംഘടനകളെ സൗദി തീവ്രവാദികളായി മുദ്രകുത്തുമ്പോള്‍ അവ സന്നദ്ധ സംഘങ്ങളാണെന്നാണ് ഖത്തറിന്റെ വാദം.

ഹമാസ് ഒരു തീവ്രവാദ സംഘമല്ലെന്നും അവര്‍ നിയമാനുസൃതം പ്രവര്‍ത്തിക്കുന്ന പ്രതിരോധ സംഘമാണെന്നും റഷ്യന്‍ സന്ദര്‍നവേളയില്‍ ഖത്തര്‍ വിദേശകാര്യ മന്ത്രി ഷെയ്ഖ് മുഹമ്മദ് ബിന്‍ അബ്ദുള്‍ റഹ്മാന്‍ അല്‍ താനി പറഞ്ഞിരുന്നു. ഖത്തറില്‍ ഹമാസിന്റേത് രാഷ്ട്രീയ സാന്നിധ്യമാണെന്നും പറഞ്ഞിരുന്നു. ഖത്തറിന്റെ സഹായം പറ്റുന്ന തീവ്രവാദികള്‍ എന്ന് പറഞ്ഞ് 29 വ്യക്തികളുടെ പേരും 12 സന്നദ്ധ സംഘടനകളുടെ പേരും സൗദി സഖ്യം പുറത്ത് വിട്ടിരുന്നു. എന്നാല്‍ ഇതെല്ലാം കെട്ടിച്ചമച്ചതാണെന്നാണ് ഖത്തറിന്റെ വാദം.

ഇസ്രായേലിനെതിരേ നില്‍ക്കുന്ന ഹമാസിനും ഈജിപ്തിനെ എതിര്‍ക്കുന്ന മുസ്ലീം ബ്രദര്‍ ഹൂഡിനും സാമ്പത്തിക സഹായം ആരോപിച്ചാണ് ഖത്തറിനെ സൗദി ഉള്‍പ്പെടെയുള്ള രാജ്യങ്ങള്‍ എതിര്‍ക്കുന്നത്. എന്നാല്‍ ഖത്തറിനെ ഗള്‍ഫ് മേഖലയിലെ രാജ്യങ്ങള്‍ക്ക് അനഭിമതരാക്കിയത് അമേരിക്ക എതിര്‍ക്കുന്നവരെ എതിര്‍ക്കാത്തതിന്റെ പേരില്‍ ആണെന്ന് അന്താരാഷ്ട്ര രാഷ്ട്രീയ വിശകലന വിദഗ്ദ്ധരും പറയുന്നു. 

അമേരിക്കയുടെ അനുയായിയായ ഇസ്രായേല്‍ എതിര്‍ക്കുന്ന ഹമാസിനെ തീവ്രവാദി എന്ന് വിളിക്കുന്നില്ല എന്ന കാരണത്താലാണ് അമേരിക്കയ്ക്ക് ഖത്തര്‍ തീരെ താല്‍പ്പര്യം ഇല്ലാത്തവരാക്കി മാറ്റിയതെന്നാണ് ഇവരുടെ വിലയിരുത്തല്‍. എഴുപതുകളില്‍ ഈജിപ്തില്‍ രൂപം കൊണ്ട മുസ്ലീം ബ്രദര്‍ഹുഡില്‍ നിന്നാണ് ഹമാസിന്റേയും ഉദ്ഘവം.