ഖത്തറില്‍ ഒരാളും വിശന്നിരിക്കാതിരിക്കാ ഇറാനില്‍ നിന്ന് അഞ്ച് വിമാനങ്ങള്‍ നിറയെ ഭക്ഷ്യ വസ്തുക്കള്‍ ഖത്തറിലെത്തി. തുര്‍ക്കിയില്‍ നിന്നും കോഴിയിറച്ചിയും മറ്റ് ഭക്ഷ്യവസ്തുക്കളും എത്തിയതിന് പിന്നാലെ ഖത്തറിലേക്ക് ഇറാനില്‍ നിന്നുള്ള ഭക്ഷ്യവസ്തുക്കളുമായി അഞ്ച് വിമാനങ്ങള്‍ ഖത്തറിലേക്ക് എത്തിയത്. വിവിധ ഭക്ഷ്യവസ്തുക്കളും പഴവര്‍ഗങ്ങളുമായി 90 ടണ്‍ ഭാരമുള്ള കാര്‍ഗോകളാണ് ഓരോ വിമാനത്തിലുള്ളതായി അറിയിച്ചിട്ടുള്ളത്. ഇതിനൊപ്പം മറ്റൊരു വിമാനംകൂടി ഖത്തറിലേക്ക് പുറപ്പെടുമെന്നും ഇറാന്‍ വ്യേമയാന വക്താവ് ശാറൂഖ് നൗഷാബാദി അറിയിച്ചതായും പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. 350 ടണ്‍ ഭക്ഷണ വസ്തുക്കളുമായി മൂന്ന് കപ്പലുകള്‍ ഖത്തറിലേക്ക് പോകാനുള്ള ഒരുക്കത്തിലാണന്നും ഇറാന്‍ സൂചന നല്‍കിയിട്ടുണ്ട്. 

ഇനിയും സഹായ പ്രവര്‍ത്തനങ്ങള്‍, ഖത്തറിന്റെ അഭിപ്രായം അനുസരിച്ച് എത്തിച്ചുകൊടുക്കുമെന്നും ഇറാന്‍ വ്യേമയാന വക്താവ് വ്യക്തമാക്കി. അതേസമയം ഉപരോധം മൂലമുള്ള ഖത്തറിന്റെ പ്രതിസന്ധികള്‍ മാറ്റാന്‍ തങ്ങളുടെ മൂന്ന് പോര്‍ട്ടുകള്‍ ഖത്തറിന് വിട്ടുനല്‍കാമെന്ന് ഇറാന്‍ അറിയിച്ചതായി ഖത്തര്‍ വിദേശകാര്യമന്ത്രി അടുത്തിടെ അറിയിച്ചിരുന്നു. എന്നാല്‍ ഈ വാഗ്ദാനം തങ്ങള്‍ ഇതുവരെ സ്വീകരിച്ചിട്ടില്ലെന്നും അദ്ദേഹം പറഞ്ഞിരുന്നു. തുര്‍ക്കിയില്‍ നിന്നും ഇറാനില്‍ നിന്നും ആവശ്യത്തിന് ഭക്ഷ്യവസ്തുക്കള്‍ എത്തിയതിനെ തുടര്‍ന്ന് ഖത്തറിലെ ഹൈപ്പര്‍മാര്‍ക്കറ്റുകളില്‍ ആവശ്യത്തിന് സ്‌റ്റോക്കുകള്‍ ഉള്ള സാഹചര്യമാണുള്ളത്. മാത്രമല്ല ഒരുവര്‍ഷത്തേക്കുള്ള ഭക്ഷ്യവസ്തുക്കള്‍ രാജ്യത്ത് കരുതലുണ്ടെന്ന് അടുത്തിടെ ഖത്തര്‍ ചേംബര്‍ അറിയിക്കുകയും ഏറ്റവും പുതിയ സാഹചര്യത്തില്‍ ഏത് പ്രതിരോധത്തെയും മറികടക്കാന്‍ കഴിയുമെന്നും അറിയിച്ചിട്ടുണ്ട്. 

കഴിഞ്ഞ ദിവസങ്ങളില്‍ തുര്‍ക്കിയില്‍ നിന്നും എത്തിയ പശുവിന്‍ പാല്‍ ഗുണമേന്‍മ മൂലം വിപണിയില്‍ തരംഗമായിട്ടുണ്ട്. സൗദിയില്‍ നിന്നുളള പ്രമുഖ ബ്രാന്‍ഡായ അല്‍ മറായി പാലിന്റെ ലക്ഷക്കണക്കിന് ലിറ്ററുകളാണ് ഓരോ ദിവസവും ഖത്തറില്‍ വിറ്റുപോയിരുന്നത്. എന്നാല്‍ ഇപ്പോള്‍ തുര്‍ക്കിയില്‍ നിന്നുള്ള പാല്‍ അല്‍മറായി പാലിനെക്കാള്‍ വിലക്കുറവുമുണ്ട്. അതിനൊപ്പം മെയ്ഡ് ഇന്‍ ഖത്തര്‍ പ്രചരണവുമായി രാജ്യത്ത് സ്വദേശി ഉത്പ്പന്നങ്ങളെ പ്രോല്‍സാഹിപ്പിക്കാനുള്ള സജീവ ശ്രമങ്ങളും നടക്കുന്നുണ്ട്. പ്രാദേശിക ഫാമുകളില്‍ നിന്നുള്ള ആഹ്വാനത്തിനും മികച്ച പ്രതികരണം ലഭിക്കുന്നു.