ഖത്തറിലേക്കുള്ള വിനോദയാത്ര എളുപ്പമാകും...ടൂറിസ്റ്റ് വിസയ്ക്കു പുതിയ ഇവിസ സംവിധാനം
ഖത്തര്‍ സന്ദര്‍ശിക്കാന്‍ ആഗ്രഹിക്കുന്ന വിനോദസഞ്ചാരികള്‍ക്ക് ഇനി വിസ വളരെ എളുപ്പമായി ലഭിക്കും. ടൂറിസ്റ്റ് വിസയ്ക്കു നേരിട്ട് അപേക്ഷിക്കാന്‍ ഇവിസ സംവിധാനം ആരംഭിച്ചു. ആഭ്യന്തര മന്ത്രാലയവും ഖത്തര്‍ എയര്‍വേയ്‌സും ഖത്തര്‍ ടൂറിസം അതോറിറ്റിയും ചേര്‍ന്നാണ് പുതിയ സംവിധാനം ആവിഷ്‌കരിച്ചിട്ടുള്ളത്.
www.qatarvisaservice.com എന്ന വെബ്‌സൈറ്റ് വഴി അപേക്ഷ നല്‍കാനുള്ള സംവിധാനം ഇപ്പോള്‍ പരീക്ഷണാടിസ്ഥാനത്തിലാണു നടപ്പാക്കിയിട്ടുള്ളത്. മുന്‍പ് ഖത്തറിലെ അംഗീകാരമുള്ള ഹോട്ടലുകള്‍, ടൂര്‍ ഓപ്പറേറ്റര്‍മാര്‍ എന്നിവര്‍ മുഖേന മാത്രമേ ടൂറിസ്റ്റ് വിസയ്ക്ക് അപേക്ഷ സാധ്യമാകുമായിരുന്നുള്ളൂ.
എന്നാല്‍, പുതിയ സംവിധാനത്തിലൂടെ യാത്രചെയ്യുന്ന ആള്‍ക്കുതന്നെ നേരിട്ട് അപേക്ഷ നല്‍കാനും പുരോഗതി ഓണ്‍ലൈനായി തന്നെ മനസ്സിലാക്കാനും കഴിയും. അപേക്ഷ സമര്‍പ്പിച്ച് 48 മണിക്കൂറിനുള്ളില്‍ പ്രതികരണമറിയാം. അപേക്ഷ സ്വീകരിച്ചാല്‍ ഇ മെയില്‍ വഴി ഇവീസ ലഭിക്കും. സര്‍വീസ് ചാര്‍ജ് ഉള്‍പ്പെടെ 42 ഡോളറാണ് ടൂറിസ്റ്റ് വീസയ്ക്കുള്ള നിരക്ക്. പാസ്‌പോര്‍ട്ടിന്റെ സ്‌കാന്‍ കോപ്പി, ഫോട്ടോ, എയര്‍ലൈന്‍ ടിക്കറ്റിന്റെ സ്‌കാന്‍ കോപ്പി, ഖത്തറില്‍ താമസിക്കാന്‍ പോകുന്ന വിലാസം എന്നിവ അപേക്ഷയോടൊപ്പം നല്‍കണം.
ഖത്തര്‍ എയര്‍വേയ്‌സില്‍ യാത്ര ചെയ്യുന്നവര്‍ ടിക്കറ്റിന്റെ സ്‌കാന്‍ കോപ്പി സമര്‍പ്പിക്കേണ്ടതില്ല. വിസ സേവനം എയര്‍ലൈനിന്റെ ബുക്കിങ് വെബ്‌സൈറ്റുമായി ബന്ധിപ്പിച്ചിട്ടുള്ളതിനാല്‍ അതു സ്വമേധയാ അപ്‌ഡേറ്റ് ആവും. കൂടുതല്‍ വിനോദസഞ്ചാരികളെ ആകര്‍ഷിക്കുകയെന്ന ലക്ഷ്യത്തോടെയാണ് ഇവിസ സേവനം ലഭ്യമാക്കുന്നത്. 2016 നവംബര്‍ മുതല്‍ സൗജന്യ ട്രാന്‍സിറ്റ് വിസ സേവനം ഖത്തര്‍ ലഭ്യമാക്കിയിരുന്നു. ഖത്തര്‍വഴി കടന്നുപോകുന്ന യാത്രക്കാര്‍ക്കു നാലുദിവസം ഖത്തറില്‍ താമസിക്കാന്‍ കഴിയുന്ന തരത്തിലാണു സൗജന്യ ട്രാന്‍സിറ്റ് വിസ സേവനം ഇപ്പോള്‍ നല്‍കുന്നത്.
https://www.facebook.com/Malayalivartha
