വിദേശികളുടെ മെഡിക്കല് സേവന നിരക്കില് വര്ധന
കുവൈറ്റില് വിദേശികളുടെ മെഡിക്കല് സേവന നിരക്ക് വര്ധന ഈ മാസം തന്നെ പ്രാബല്യത്തില് വരുമെന്ന് ആരോഗ്യമന്ത്രി ഡോ. ജമാല് അല് ഹര്ബി അറിയിച്ചു. ചില സാങ്കേതിക കാരണങ്ങളാല് ഫെബ്രുവരിയില് നടപ്പിലാക്കാനിരുന്ന നിരക്ക് വര്ധന വൈകി. സന്ദര്ശക വീസയില് കുവൈത്തിലുള്ള വിദേശികളുടെ ചികിത്സാ സേവന നിരക്ക് വര്ധനയാകും ആദ്യഘട്ടത്തില് നടപ്പാക്കുക. തൊഴില്, ആശ്രിത വീസകളിലുള്ളവരുടേത് രണ്ടാം ഘട്ടത്തില് വര്ധിപ്പിക്കും.
രാജ്യത്ത് ചികിത്സാ സേവനത്തിന് ഈടാക്കുന്ന ഫീസ് മറ്റു രാജ്യങ്ങളുമായി താരതമ്യപ്പെടുത്തുമ്പോള് വളരെ തുച്ഛമാണെന്നാണ് അധികൃതരുടെ കണക്ക്. അനിവാര്യമായ സാഹചര്യത്തിലാണ് നിരക്ക് വര്ധന ഏര്പ്പെടുത്തുന്നതെന്നും മന്ത്രി പറഞ്ഞു. വര്ധിപ്പിക്കുന്ന നിരക്ക് സ്വകാര്യമേഖലയിലെ നിരക്കോളം വരില്ലെന്നും അദ്ദേഹം വ്യക്തമാക്കി. നിരക്ക് വര്ധന പ്രാബല്യത്തിലായാലും പ്രവര്ത്തന ചെലവും വരവും തമ്മിലുള്ള അന്തരം നിലനില്ക്കുമെന്നാണ് അധികൃതര് നല്കുന്ന വിശദീകരണം.
ചികിത്സാമേഖലയില് നൂതന സംവിധാനങ്ങള് ഏര്പ്പെടുത്തുന്നതിനു ഭാരിച്ച ചെലവാണ് സര്ക്കാര് വഹിക്കുന്നതെന്ന് അധികൃതര് വിശദീകരിക്കുന്നു. എമര്ജന്സി, ആക്സിഡന്റ് തുടങ്ങിയ കേസുകളില് ചികിത്സ സൗജന്യമായാണു നല്കിവരുന്നത്. ന്യൂക്ലിയര്, റേഡിയേഷന് തുടങ്ങിയവയ്ക്ക് ചെലവിനേക്കാള് അമ്പതു ശതമാനം കുറവാണ് ഈടാക്കുന്ന തുക. ലബോറട്ടറി, ന്യൂക്ലിയര് ലബോറട്ടറി തുടങ്ങിയ വിഭാഗങ്ങളില് സ്വകാര്യ ആശുപത്രികള് ഈടാക്കുന്ന തുക സംബന്ധിച്ച് പഠനം നടത്തിയ ശേഷമാണ് റിപ്പോര്ട്ട് തയാറാക്കിയെതെന്നും സമിതി നേരത്തെ വ്യക്തമാക്കിയിരുന്നു.
https://www.facebook.com/Malayalivartha
