പ്രവാസി ഇന്ത്യക്കാരുടെ മൃതദേഹം നാട്ടിലെത്തിക്കുന്നതുമായി ബന്ധപ്പെട്ട കേസ് സുപ്രീം കോടതിയില് ഫയല് ചെയ്തു
വിദേശത്തു മരിക്കുന്ന പ്രവാസി ഇന്ത്യക്കാരുടെ മൃതദേഹം നാട്ടിലെത്തിക്കുന്നതിനു 48 മണിക്കൂര് മുമ്പ് എയര്പോര്ട്ടില് വിവരം അറിയിക്കണമെന്ന അധികൃതരുടെ നിര്ദേശം ചോദ്യംചെയ്ത് അബുദാബി യൂണിവേഴ്സല് ആശുപത്രി മാനേജ്മെന്റ് ഇന്ത്യയിലെ സുപ്രീം കോടതിയില് കേസ് ഫയല് ചെയ്തു. ഈ നിര്ദേശം മനുഷ്യാവകാശ ലംഘനമാണെന്നും ഇന്ത്യന് ഭരണഘടനയിലെ മൗലികാവകാശങ്ങള്ക്ക് എതിരാണെന്നും ഹര്ജിയില് ചൂണ്ടിക്കാട്ടുന്നു. അഡ്വ. ഹാരിസ് ബീരാന് മുഖേനയാണു സുപ്രീം കോടതിയില് കേസ് റജിസ്റ്റര് ചെയ്തതെന്ന് യൂണിവേഴ്സല് ആശുപത്രി മാനേജിങ് ഡയറക്ടര് ഡോ. ഷെബീര് നെല്ലിക്കോട് അറിയിച്ചു.
ഹര്ജി ഫയലില് സ്വീകരിച്ചശേഷം ജസ്റ്റിസ് പി.ബി.സുരേഷ് കുമാര് വിധി പറയാന് മാറ്റിവച്ചതായും അദ്ദേഹം പറഞ്ഞു. 1954-ലെ ഇന്ത്യന് എയര്ക്രാഫ്റ്റ് പൊതുജനാരോഗ്യ നിയമമനുസരിച്ചുള്ളതാണു നിര്ദേശമെന്നും നിയമവിധേയമാണിതെന്നുമാണ് ഹര്ജിയെ ചോദ്യംചെയ്ത കേന്ദ്രസര്ക്കാര് ചൂണ്ടിക്കാട്ടുന്നത്. ഭരണഘടനയുടെ 21ാം വകുപ്പനുസരിച്ചു മൃതദേഹം അന്തസ്സോടെ സംസ്കരിക്കാനുള്ള അവകാശത്തിന് എതിരാണ് എയര്പോര്ട്ട് ഹെല്ത്ത് ഓഫിസറുടെ നിര്ദേശമെന്നും ഹര്ജിയില് പറയുന്നു. മൃതദേഹത്തോടുള്ള അനാദരവും സംസ്കരിക്കാനും മറ്റും കാലതാമസം നേരിടുന്നതും ഭരണഘടനയുടെ 21-ാം വകുപ്പിനെതിരാണെന്നും ഹര്ജിയില് പറയുന്നു.
ആരോഗ്യരംഗത്തു പ്രവര്ത്തിക്കുന്നതിനാല് ഇത്തരം കാര്യങ്ങളില് ഇടപെടേണ്ടിവരാറുണ്ട്. ആശുപത്രികളിലും മറ്റും മരിക്കുന്നവരുടെ ഭൗതികശരീരം ആദരവോടെ സംസ്കരിക്കാനും നാട്ടിലെത്തിക്കാനുമുള്ള ധാര്മിക പിന്തുണയാണ് ഈ ഹര്ജിയിലൂടെ ഉദ്ദേശിക്കുന്നതെന്നും മാനുഷിക കടമയുടെ ഭാഗമാണിതെന്നും യൂണിവേഴ്സല് ആശുപത്രി അധികൃതര് പറഞ്ഞു. ഇന്ത്യന് ഇസ്ലാമിക് സെന്റര് ജനറല് സെക്രട്ടറി കരപ്പാത്ത് ഉസ്മാനും വാര്ത്താസമ്മേളനത്തില് പങ്കെടുത്തു.
https://www.facebook.com/Malayalivartha
