ഓസ്ട്രിയന്‍ റെയില്‍വെ ഏറ്റവും പുതിയ ജനുസ്സില്‍പെട്ട സീമന്‍സ് ഡെസീറോ എംഎല്‍ ട്രെയിനുകള്‍ 100 എണ്ണം വാങ്ങാന്‍ കരാറിലേര്‍പ്പെട്ടതായി റെയില്‍വേ മേധാവി ക്രിസ്റ്റ്യന്‍ കേറന്‍ പത്രസമ്മേളനത്തില്‍ അറിയിച്ചു. മണിക്കൂറില്‍ 160 കി.മി വേഗതയുള്ള പുതിയ വണ്ടികളില്‍ (സ്പീഡ് ട്രെയിന്‍) 30 എണ്ണം 6 സെറ്റ് വാതിലോടുകൂടിയതും 244 സിറ്റിംഗ് കപ്പാസിറ്റി ഉള്ളതുമാണ്. 70 ട്രെയിനുകള്‍ക്ക് 4 സെറ്റ് ഡോറുകളും 259 സിറ്റിംഗ് കപ്പാസിറ്റിയുമാണ്. കൂടാതെ ഓരോ സീറ്റിനും പവര്‍ ചാര്‍ജിങ്ങിനുള്ള പ്ലഗ്, മടക്കാവുന്ന ടേബിള്‍, ഓരോ വണ്ടിയിലും 26 ഇഞ്ച് ടി വി സ്‌ക്രീന്‍ എന്നിവയുണ്ട്. 

2015 ഓടുകൂടി ഓടിത്തുടങ്ങുന്ന ഈ മനോഹര വണ്ടികള്‍ക്ക് 550 മില്യണ്‍ ഡോളറാണ് വകയിരുത്തിയിരിക്കുന്നത് .ഇതിന്റെ 90 ശതമാനവും കേന്ദ്ര റെയില്‍വേ മന്ത്രാലയമാണ് വഹിക്കുന്നത്. വിയന്ന അടക്കമുള്ള നാല് സംസ്ഥാനങ്ങളില്‍ ആയിരിക്കും ആധുനിക സംവിധാനങ്ങള്‍ ഉള്ള ഈ ട്രെയിനുകള്‍ ആദ്യം ഓടിത്തുടങ്ങുക. 

വാര്‍ത്ത അയച്ചത് : ഷിജി ചീരംവേലില്‍