സൗദിയില്‍ ചെറുകിട സ്ഥാപനങ്ങളിലെ വിദേശി ജോലിക്കാരുടെ ലെവി സംഖ്യ 80 ശതമാനം തിരിച്ചു നല്‍കും. ചെറുകിട, ഇടത്തരം സ്ഥാപനങ്ങളുടെ മേല്‍നോട്ടം വഹിക്കുന്ന 'മുന്‍ശആത്ത്' വഴിയാണ് സംഖ്യ തിരിച്ചുകിട്ടാനായി ഓണ്‍ലൈന്‍ വഴിയാണ് അപേക്ഷിക്കേണ്ടത്. വിദേശികളുടെ ലെവി ഉള്‍പ്പെടെ ഒമ്പത് ഇനം സര്‍ക്കാര്‍ ഫീസുകള്‍ തിരിച്ചു നല്‍കാനാണ് മന്ത്രാലയ സമിതി തീരുമാനിച്ചത്. എന്നാല്‍ ഇത്തരം സ്ഥാപനങ്ങളിലെ ജോലിക്കാരുടെ ആശ്രിത ലെവി തിരിച്ചു ലഭിക്കില്ല. ചെറുകിട, ഇടത്തരം സ്ഥാപനങ്ങളുടെ സാമ്പത്തിക ഭാരം കുറക്കുക, ഇത്തരം സ്ഥാപനങ്ങള്‍ക്ക് പ്രോല്‍സാഹനവും സര്‍ക്കാര്‍ സഹായവും ലഭ്യമാക്കുക എന്നതാണ് ഈ ആനുകൂല്യത്തിലൂടെ 'മുന്‍ശആത്ത്' ലക്ഷ്യമാക്കുന്നത്.

സി.ആര്‍ തുറക്കുന്നതിന് ചെലവായ ഫീസ്, ചേംബര്‍ രജിസ്‌ട്രേഷന്‍ ഫീസ്, സൗദി പോസ്റ്റില്‍ ഡോര്‍ ഡെലിവറിക്കുള്ള 'വാസില്‍' അംഗത്വ ഫീസ്, ബലദിയ ലൈസന്‍സ് ഫീസ്, ട്രേഡ് മാര്‍ക്ക് രജിസ്‌ട്രേഷന്‍, സാമ്പത്തിക ഇടപാടുകള്‍ നടത്താനുള്ള ലൈസന്‍സ്, എസ്റ്റാബ്ലിഷ്മന്റെിനെ കമ്പനിയാക്കാന്‍ ചെലവായ ഫീസ്, സ്ഥാപന കോണ്‍ട്രാക്ട് പബ്ലിഷിങ് ഫീസ് തുടങ്ങിയവയാണ് ലെവിക്ക് പുറമെ തിരിച്ചു നല്‍കുക. ഇതില്‍ ലെവി ഒഴിച്ചുള്ളതെല്ലാം മുഴുവനായും തിരിച്ചുനല്‍കും. വിശദാംശങ്ങള്‍ "https://esterdad.monshaat.gov.sa/Home/FQ എന്ന വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്.

ലെവി തിരിച്ചു ലഭിക്കുന്നതിന്

2016 ജനുവരി ഒന്നിനു ശേഷം നിലവില്‍ വന്ന സ്ഥാപനമായിരിക്കുക, സ്ഥാപന ഉടമ സ്വദേശിയായിരിക്കുക, സ്ഥാപനം തുടങ്ങി മൂന്നു വര്‍ഷം പൂര്‍ത്തിയാകാതിരിക്കുക, നിതാഖത്ത് പദ്ധതി പ്രകാരമുള്ള സ്വദേശിവത്ക്കരണം നടപ്പാക്കുക എന്നിവയാണ് ലെവി തിരിച്ചു ലഭിക്കുന്നതിനുള്ള നിബന്ധനകള്‍ .ഏഴ് ശതകോടി റിയാലാണ് ഇത്തരത്തിലുള്ള ഫീസ് തിരിച്ചു നല്‍കുന്നതിന് അനുവദിച്ചത്. 2021 വരെ തിരിച്ചു നല്‍കല്‍ തുടരും. അതിന് മുമ്പായി ഫണ്ട് അവസാനിച്ചാല്‍ നിര്‍ത്തിവെക്കുമെന്നും 'മുന്‍ശആത്ത്' വ്യക്തമാക്കി.

നിബന്ധനകള്‍ പാലിക്കാത്ത അപേക്ഷകള്‍ തള്ളപ്പെടും. എന്നാല്‍ തള്ളപ്പെട്ട അപേക്ഷകള്‍ 30 ദിവസത്തിനകം വിയോജിപ്പ് പ്രകടിപ്പിച്ച് വീണ്ടും സമര്‍പ്പിക്കാവുന്നതാണ്. ഇത്തരത്തിലുള്ള അപേക്ഷകള്‍ 60 ദിവസത്തിനകം പരിഗണനക്കെടുക്കും. അധികൃതരെ കബളിപ്പിക്കുകയോ, അനധികൃതമായോ അനര്‍ഹമായോ ആനുകൂല്യം പറ്റുകയോ ചെയ്യുന്ന സ്ഥാപനങ്ങള്‍ക്കെതിരെ കടുത്ത ശക്ഷാ നടപടി സ്വീകരിക്കും.