കുവൈറ്റില് നിന്ന് ഇന്ത്യയിലേക്കുള്ള വിമാന സര്വ്വീസുകളുടെ എണ്ണം വര്ദ്ധിപ്പിക്കാന് സാധ്യത
കുവൈത്തില്നിന്ന് ഇന്ത്യയിലേക്കുള്ള വിമാന സര്വിസുകളുടെ എണ്ണം വര്ദ്ധിപ്പിക്കാന് സാധ്യതയേറുന്നു. കഴിഞ്ഞദിവസം മുംബൈയില് കുവൈത്ത് സിവില് വ്യോമയാന വകുപ്പ് മേധാവി ശൈഖ് സല്മാന് സബാഹ് സാലിം അല് ഹമൂദ് അസ്സബാഹും കേന്ദ്ര വ്യോമയാന വകുപ്പ് മന്ത്രി സുരേഷ് പ്രഭുവും പങ്കെടുത്ത കൂടിക്കാഴ്ചയില് ഇതുസംബന്ധിച്ച് പ്രാഥമിക ചര്ച്ചകള് നടന്നു. സിവില് വ്യോമയാന രംഗത്തെ സഹകരണം കൂടുതല് ശക്തിപ്പെടുത്താന് നിരവധി നിര്ദേശങ്ങളും യോഗത്തില് ഉയര്ന്നുവന്നു. ഇരുരാജ്യങ്ങളിലെയും വ്യോമയാന മേഖലയിലെ സാങ്കേതികവിദഗ്ധര് തമ്മില് ആശയ സംവാദങ്ങള് വര്ധിപ്പിക്കുക, വിമാന സര്വിസുകളുടെ എണ്ണം കൂട്ടുക, ഇന്ത്യയിലെയും കുവൈത്തിലെയും വിമാനക്കമ്പനികള് പരസ്പരം സഹകരിച്ചു പ്രവര്ത്തിക്കുക തുടങ്ങിയവയാണ് പ്രധാന നിര്ദേശങ്ങള്.
ഇരുരാജ്യങ്ങളും തമ്മിലുള്ള കരാര് അനുസരിച്ച് നിലവില് ആഴ്ചയില് 12,000 സീറ്റുകള്ക്കാണ് കുവൈത്ത് എയര്വേസിനും ജസീറ എയര്വേസിനുമായി അനുമതിയുള്ളത്. ഇത് വര്ധിപ്പിച്ചുനല്കുകയാണെങ്കില് കൂടുതല് സര്വിസ് നടത്താന് താല്പര്യമുണ്ടെന്നാണ് കമ്പനി അധികൃതര് പറയുന്നത്. പത്തുലക്ഷത്തോളം ഇന്ത്യക്കാര് കുവൈത്തിലുണ്ട്. ഇവരുടെ പോക്കുവരവും സൗദിയിലേക്കും ഈജിപ്തിലേക്കും തുര്ക്കിയിലേക്കും കണക്ഷന് വിമാനത്തില് പോകുന്നവരുമടക്കം പരിഗണിക്കുമ്പോള് സീറ്റുവിഹിതം വളരെ അപര്യാപ്തമാണ്.
ചില സീസണുകളില് ടിക്കറ്റ് കിട്ടാതാവുന്നതിനും നിരക്ക് കുത്തനെ ഉയരുന്നതിനും സീറ്റ് അപര്യാപ്തയും കാരണമാണ്. കൂടുതല് സീറ്റും സര്വിസും വരുമ്പോള് വിമാനക്കമ്പനികള് തമ്മില് മത്സരം ശക്തമാവാനും ടിക്കറ്റ് നിരക്ക് കുറയാനും വഴിയൊരുങ്ങും.
https://www.facebook.com/Malayalivartha
