ഇനി മുതല് രാത്രിസമയങ്ങളില് നിര്മ്മാണ ജോലികള് അനുവദിക്കില്ലെന്ന് മസ്കറ്റ് നഗരസഭയുടെ മുന്നറിയിപ്പ്
രാത്രിസമയങ്ങളില് നിര്മാണ ജോലികള് അനുവദിക്കില്ലെന്ന് മസ്കത്ത് നഗരസഭയുടെ മുന്നറിയിപ്പ് . നിര്മാണ പ്രവര്ത്തനങ്ങള് സംബന്ധിച്ച നഗരസഭ നിയമത്തിന്റെ ലംഘനമാണിത്. ചില കരാറുകാര് നിയമം ലംഘിച്ച് അനുവദനീയമായ സമയം കഴിഞ്ഞും നിര്മാണ ജോലികള് നടത്തുന്നത് ശ്രദ്ധയില്പെട്ടതിന്റെ അടിസ്ഥാനത്തിലാണ് നടപടി. നഗരസഭയില്നിന്നുള്ള മുന്കൂര് അനുമതിയില്ലാതെ സൂര്യാസ്തമയം മുതല് സൂര്യോദയം വരെ സമയത്ത് നിര്മാണ ജോലികള് പാടില്ലെന്നാണ് 1992ലെ നഗരസഭ നിയമത്തിന്റെ 104ാം വകുപ്പ് നിഷ്കര്ഷിക്കുന്നത്.
കെട്ടിടം നിര്മിക്കുമ്പോഴും പൊളിക്കുമ്പോഴുമെല്ലാം സമീപവാസികളുടെ സുരക്ഷയും അവരുടെ സ്വത്തിന്റെ സംരക്ഷണവും ജീവനക്കാരുടെയുമെല്ലാം സംരക്ഷണം ഉറപ്പാക്കാന് മതിയായ മുന്കരുതല് നടപടികള് എടുക്കണമെന്ന് നിയമത്തിന്റെ 105ാം വകുപ്പും നിഷ്കര്ഷിക്കുന്നു. നിയമം ലംഘിക്കുന്ന കരാറുകാരില്നിന്ന് പിഴ ചുമത്തുകയും വര്ക്ക് പെര്മിറ്റ് റദ്ദാക്കുന്നതടക്കം നടപടികള് സ്വീകരിക്കുകയും ചെയ്യും. പരാതികളുടെ അടിസ്ഥാനത്തില് നഗരസഭ ഉദ്യോഗസ്ഥര് നടത്തിയ പരിശോധനകളില് അനുമതിയില്ലാതെ രാത്രികളിലും നിര്മാണ പ്രവൃത്തികള് നടത്തുന്നത് കണ്ടെത്തിയതിന്റെ അടിസ്ഥാനത്തിലാണ് മുന്നറിയിപ്പ് നല്കുന്നതെന്ന് നഗരസഭ വക്താവ് പറഞ്ഞു.
വളരെയധികം ആവശ്യമെന്നു കണ്ടാല് മാത്രമേ ശബ്ദശല്യമുണ്ടാകുന്ന ജോലികള് രാത്രി നടത്താന് അനുമതി നല്കുകയുള്ളൂവെന്നും നഗരസഭ വക്താവ് കൂട്ടിച്ചേര്ത്തു. നിയമലംഘനങ്ങള് ശ്രദ്ധയില്പ്പെട്ടാല് നഗരസഭ ഹോട്ട്ലൈനിലോ റോയല് ഒമാന് പൊലീസിലോ പബ്ലിക് പ്രോസിക്യൂഷനിലോ പരാതി നല്കാം.
https://www.facebook.com/Malayalivartha