തെരഞ്ഞെടുപ്പ് അസാധുവാക്കിയ ഹൈകോടതി വിധിക്കെതിരെ ഒരുമാസത്തിനകം സുപ്രിംകോടതിയില്‍ നിന്ന് സ്‌റ്റേ ലഭിക്കാത്ത പക്ഷം കാരാട്ട് റസാഖിനെ അയോഗ്യനാക്കി തീരുമാനം പ്രഖ്യാപിക്കുമെന്ന് നിയമസഭാ സ്പീക്കര്‍ പി.ശ്രീരാമകൃഷ്ണന്‍ വ്യക്തമാക്കി. കെ.എം. ഷാജിയുടെ കാര്യത്തില്‍ എടുത്ത അതേ നിലപാട് തന്നെ കാരാട്ട് റസാഖിന്റെ കാര്യത്തിലും കൈക്കൊള്ളുമെന്ന് അദ്ദേഹം ദുബൈയില്‍ മാധ്യമ പ്രവര്‍ത്തകരോടു പറഞ്ഞു. കാരാട്ട് റസാഖിന് സുപ്രിം കോടതിയെ സമീപിക്കുന്നതിന് ഹൈക്കോടതി ഒരു മാസം സമയം അനുവദിച്ചിട്ടുണ്ട്. നേരത്തേ കെ.എം. ഷാജിയെ സഭയില്‍ വരുന്നത് തടഞ്ഞത് നിയമപരമായ ബാധ്യത പാലിക്കുവാന്‍ വേണ്ടി മാത്രമാണ്. തെരഞ്ഞെടുപ്പ് റദ്ദാക്കിയ ഹൈകോടതി സുപ്രിംകോടതിയെ സമീപിക്കാന്‍ 15 ദിവസം സമയം അനുവദിച്ചിരുന്നു.

ഫെബ്രുവരിയില്‍ ദുബൈയില്‍ നടക്കുന്ന ലോക കേരള സഭ പശ്ചിമേഷ്യാ ഉച്ചകോടിയുടെ പ്രാരംഭ അവലോകനത്തിന് ദുബൈയില്‍ എത്തിയതാണ് സ്പീക്കര്‍. എന്നാല്‍ ആ കാലയളവിനുള്ളില്‍ സ്‌റ്റേ സമ്പാദിക്കാന്‍ കഴിയാഞ്ഞ സാഹചര്യത്തിലാണ് ഷാജിയെ സഭയില്‍ വരുന്നതില്‍ നിന്ന് വിലക്കിയതെന്നും സ്പീക്കര്‍ കൂട്ടിച്ചേര്‍ത്തു..