സൗദിയില്‍ ഉംറ വിസയിലെത്തുന്നവര്‍ക്ക് രാജ്യത്തെ എല്ലാ നഗരങ്ങളിലേക്കും സഞ്ചരിക്കാനും കടകള്‍ 24 മണിക്കൂറും തുറന്നുപ്രവര്‍ത്തിക്കാനും അനുമതി. സല്‍മാന്‍ രാജാവിന്റെ അധ്യക്ഷതയില്‍ ചേര്‍ന്ന മന്ത്രിസഭ യോഗത്തിലാണ് സുപ്രധാന തീരുമാനങ്ങള്‍. നിലവില്‍ 12 മണിക്ക് കടകള്‍ അടക്കണമെന്നായിരുന്നു നിയമം. പൊതുജന താല്‍പര്യാര്‍ഥം ഇക്കാര്യം പരിശോധിച്ച് അനുമതി നല്‍കേണ്ട വിഭാഗത്തിലെ സ്ഥാപനങ്ങളെ തീരുമാനിക്കാന്‍ മുനിസിപ്പല്‍ ഗ്രാമകാര്യ മന്ത്രാലയത്തോട് മന്ത്രിസഭ ആവശ്യപ്പെട്ടു. ഇടവേളകളില്ലാതെ 24 മണിക്കൂറും കടകള്‍ക്ക് പ്രവര്‍ത്തിക്കാവുന്ന തീരുമാനം വ്യാപാരമേഖലയില്‍ വലിയ ഉണര്‍വുണ്ടാക്കുമെന്നാണ് പ്രതീക്ഷ.

സൗദിയില്‍ നിശ്ചിത അനുമതിയുള്ള കടകളൊഴികെ രാത്രി 12 മണിക്ക് അടക്കണമെന്നാണ് നിയമം. റമദാനില്‍ ഇതില്‍ ഇളവുണ്ടാവാറുണ്ട്. വ്യവസ്ഥകള്‍ക്ക് വിധേയമായി ചില സ്ഥാപനങ്ങള്‍ക്ക് ഇളവുകള്‍ നല്‍കാറുണ്ട്. ഇത് വിപുലമാക്കാന്‍ ഉദ്ദേശിച്ചുള്ളതാണ് പുതിയ നീക്കം. അതേസമയം, നമസ്‌കാര സമയങ്ങളില്‍ കടകള്‍ അടക്കണമെന്ന നിയമത്തില്‍ ഇളവുണ്ടാവുമോ എന്ന കാര്യം വ്യക്തമല്ല. ഉംറ, സന്ദര്‍ശന വിസക്കാര്‍ക്ക് സൗദിയിലെ എല്ലാ നഗരങ്ങളിലും സഞ്ചരിക്കാനുള്ള നിയമത്തിനും മന്ത്രിസഭ അംഗീകാരം നല്‍കി.
ഇതോടെ 36 വര്‍ഷം മുമ്പ് പാസാക്കിയ നിയമം ദുര്‍ബലമായി. ഉംറ വിസയില്‍ സൗദിയില്‍ വരുന്നവര്‍ക്ക് മക്ക, മദീന, ജിദ്ദ നഗരങ്ങള്‍ക്ക് പുറത്തേക്ക് പോകുന്നതിന് 1987 മുതലാണ് വിലക്കേര്‍പ്പെടുത്തിയത്. ഇതു പ്രകാരം ഉംറ വിസക്കാരെ മറ്റു നഗരങ്ങളിലേക്ക് കൊണ്ടുപോകുന്ന വാഹനങ്ങള്‍ക്കും ശിക്ഷയുണ്ടായിരുന്നു. ഇതൊഴിവാക്കാന്‍ ഏപ്രില്‍ 23ന് ചേര്‍ന്ന സൗദി ശൂറ കൗണ്‍സില്‍ അനുമതി നല്‍കിയിരുന്നു.