വിശുദ്ധ ഹജ്ജ് കര്‍മത്തിലെ സുപ്രധാനമായ ചടങ്ങായ അറഫ സംഗമം ഇന്ന്. ലോകത്തെ വിവിധ രാജ്യങ്ങളില്‍ നിന്നുള്ള 20 ലക്ഷത്തിലധികം തീര്‍ഥാടകര്‍ അറഫ മഹാസംഗമത്തില്‍ പങ്കെടുക്കും. വെള്ളിയാഴ്ച മിനായില്‍ താമസിച്ച ഹാജിമാര്‍ അര്‍ധരാത്രിയോടെ ലബ്ബൈക്ക മന്ത്രമുരുവിട്ട് അറഫയിലേക്ക് നീങ്ങി. ബസ്, ട്രെയിന്‍ മാര്‍ഗമാണ് യാത്ര. 25,000 മലയാളികളില്‍ 70 ശതമാനം പേരും മെട്രോ ട്രെയിനിലാണ് സഞ്ചരിക്കുന്നത്. മലയാളികള്‍ ഉള്‍പ്പെടെ ഹാജിമാര്‍ പ്രളയദുരന്തത്തില്‍നിന്ന് നാടിനെയും വീടിനെയും രക്ഷിക്കാനുള്ള പ്രാര്‍ഥനയിലാണ്. ബന്ധുക്കള്‍ ദുരന്തത്തില്‍ മരിച്ചവരും വീടുതകര്‍ന്നവരുമുണ്ട് ഹാജിമാരുടെ കൂട്ടത്തില്‍. വിതുമ്പിക്കരഞ്ഞാണ് അവര്‍ വെള്ളിയാഴ്ച മിനായില്‍ കഴിച്ചുകൂട്ടിയത്. കടുത്ത ചൂടാണ് മിനായില്‍. അറഫയിലും കൊടുംചൂട് പ്രതീക്ഷിക്കുന്നുണ്ട്.

ശനിയാഴ്ച ഉച്ചക്ക് നമിറ പള്ളിയില്‍ അറഫ പ്രഭാഷണം സൗദി ഉന്നത പണ്ഡിതസഭാംഗം ശൈഖ് മുഹമ്മദ് ബിന്‍ ഹസന്‍ ആലുശൈഖ് നിര്‍വഹിക്കും. ഹാജിമാര്‍ ളുഹര്‍, അസര്‍ നമസ്‌കാരങ്ങള്‍ ഒരുമിച്ച് നിര്‍വഹിക്കും. മനമുരുകി പ്രാര്‍ഥനയുടേതാണ് ഈ ദിനം. സൂര്യാസ്തമയം കഴിഞ്ഞയുടന്‍ മുസ്ദലിഫയിലേക്കു പോകും. അവിടെ ആകാശച്ചോട്ടില്‍ വിശ്രമിച്ച ശേഷം ഞായറാഴ്ച പുലര്‍ച്ചെ ജംറയില്‍ പിശാചിനെ കല്ലെറിയുന്ന കര്‍മത്തിന് പോകും. ശേഷം മിനായിലെ കൂടാരത്തില്‍ വിശ്രമിച്ചാണ് മറ്റു കര്‍മങ്ങള്‍ക്ക് പോവുക.

ഇന്ത്യയില്‍നിന്ന് രണ്ടു ലക്ഷം ഹാജിമാരുണ്ട് ഇത്തവണ. അറഫയിലും മിനായിലും ഇന്ത്യന്‍ ഹജ്ജ് മിഷന്‍ എല്ലാ സൗകര്യങ്ങളുമൊരുക്കിയിട്ടുണ്ട്.