വിശുദ്ധ ഹജ്ജിന്റെ ഭാഗമായ അറഫദിനം കഴിഞ്ഞ് സൗദിയിലും ഗള്ഫ് നാടുകളിലും ഇന്ന് ബലിപെരുന്നാള്...
വിശുദ്ധ ഹജ്ജിന്റെ ഭാഗമായ അറഫദിനം കഴിഞ്ഞ് സൗദിയിലും ഗള്ഫ് നാടുകളിലും ഇന്ന് ബലിപെരുന്നാള്. അറഫയില് പ്രാര്ഥനയില് പങ്കെടുത്ത ഹാജിമാര്ക്ക് ഐക്യദാര്ഢ്യം പ്രകടിപ്പിച്ച് ഇന്നലെ മുസ്ലീംകള് വ്രതമെടുത്തു. ഹാജിമാര് അറഫസംഗമത്തില് പങ്കെടുത്ത് ശനിയാഴ്ച പുലര്ച്ചെയോടെ മിനായില് തിരിച്ചെത്തിത്തുടങ്ങി. അറഫ സംഗമം കഴിഞ്ഞ് സൂര്യാസ്തമനത്തോടെ മുസ്ദലിഫയില് വന്ന് ആകാശച്ചോട്ടില് വിശ്രമിച്ചാണ് തീര്ഥാടകര് മിനായിലേക്ക് തിരിച്ചത്. അവിടെ നിന്ന് ശേഖരിച്ച കല്ലുകളുമായി ഇന്ന് ജംറയില് ആദ്യകല്ലേറുകര്മം പൂര്ത്തിയാക്കും. തലമുണ്ഡനം ചെയ്യലും ബലിയറുക്കലും മക്ക ഹറമില് ഹജ്ജിനു ശേഷമുള്ള ഉംറ നിര്വഹിക്കലുമായി തിരക്കുള്ള ദിനമാണ് ഹാജിമാര്ക്കിന്ന്.
സൗദി അറേബ്യക്ക് പുറമെ യു.എ.ഇ, ബഹ്റൈന്, കുവൈത്ത്, ഖത്തര് തുടങ്ങിയ ഗള്ഫ് രാജ്യങ്ങളിലും ഇന്ന് ഈദാഘോഷം നടക്കും.ഒമാനില് തിങ്കളാഴ്ചയാണ് പെരുന്നാള്. രാഷ്ട്രനായകര് ജനങ്ങള്ക്കും വിവിധ ഭരണാധികാരികള്ക്കും ഈദ് ആശംസ നേര്ന്നു. പെരുന്നാളിനു മുന്നോടിയായി നൂറുകണക്കിന് തടവുകാര്ക്ക് മോചനവും പ്രഖ്യാപിച്ചിട്ടുണ്ട്.
അറഫയില് പ്രാര്ഥനയുടെ മഹാസാഗരം. വിശ്വാസി ലക്ഷങ്ങള് അറഫയില് സംഗമിച്ചു. സ്വപ്ന തീര്ഥാടനത്തിന്റെ ആനന്ദ നിമിഷങ്ങളില് അവര് എല്ലാം പരമകാരുണികനായ നാഥനു മുന്നില് സമര്പ്പിച്ചു. സ്വര്ഗസ്ഥനാക്കണേ എന്ന് കേണപേക്ഷിച്ചു. ഈ മണ്ണില് പ്രാര്ഥിച്ചു കരഞ്ഞുതീര്ക്കാന് അവര് കാത്തുവെച്ച കണ്ണീര്തുള്ളികള് വീണുടഞ്ഞ് ജബലുറഹ്മയുടെ താഴ്വാരം ഒരിക്കല് കൂടി നനഞ്ഞു കുതിര്ന്നു. മലയാളി ക്യാമ്പുകളില് നാടിനെ പ്രളയത്തില്നിന്ന് രക്ഷിക്കാന് കണ്ണീരണിഞ്ഞ പ്രാര്ഥനകളായിരുന്നു. ഇബ്രാഹിം പ്രവാചകന്റെ ത്യാഗസ്മരണയില് ലോകജനതയുടെ ഒരുമയും വിനയവും സ്നേഹവും ഈ താഴ്വാരത്തെ വീര്പ്പുമുട്ടിച്ചു. തെരുവ് പാല്ക്കടലായ കാഴ്ച. അതിനിടയില് വര്ണക്കുടകളുടെ സുന്ദരദൃശ്യങ്ങള്. ചരിത്ര പ്രസിദ്ധമായ നമീറപള്ളി ശനിയാഴ്ച പുലരും മുമ്പേ നിറഞ്ഞുകവിഞ്ഞു. ജബലു റഹ്മ പര്വതത്തിന് മുകളില് വെള്ളിയാഴ്ച പാതിരാനേരം മുതല് ഹാജിമാര് ഇടംപിടിച്ചു.ഹജ്ജ് കര്മത്തിന്റെ സുപ്രധാന ദിനത്തില് 22 ലക്ഷത്തോളം തീര്ഥാടകരാണ് അറഫയില് സംഗമിച്ചത്.
https://www.facebook.com/Malayalivartha
