സൗദി അറേബ്യയിലെ നിക്ഷേപക സാധ്യതകള്‍ ലോകത്തിനു മുന്നില്‍ തുറന്നിട്ട് ആഗോള നിക്ഷേപക സമ്മേളനം (ഫ്യൂച്ചര്‍ ഇന്‍വെസ്റ്റ്മന്റെ് ഇനിഷ്യേറ്റിവ്) റിയാദില്‍ ചൊവ്വാഴ്ച തുടങ്ങി. വ്യാഴാഴ്ച സമാപിക്കുന്ന ത്രിദിന സമ്മേളനത്തിന്റെ സംഘാടകരായ സൗദി പബ്ലിക് ഇന്‍വെസ്റ്റ്മന്റെ് ഫണ്ട് ഗവര്‍ണര്‍ യാസിര്‍ അല്‍റുമയ്യാന്‍ ഉദ്ഘാടന പ്രഭാഷണം നിര്‍വഹിച്ചു. ആദ്യദിനം 23 വന്‍കിട കരാറുകള്‍ ഒപ്പുവെച്ചു. ലോകത്തിന്റെ വിവിധ ഭാഗങ്ങളില്‍നിന്ന് രാഷ്ട്രത്തലവന്മാരും ആറായിരത്തോളം പ്രതിനിധികളും പങ്കെടുക്കുന്ന സമ്മേളനം റിയാദില്‍ റിറ്റ്‌സ് കാള്‍ട്ടണ്‍ ഹോട്ടലിലെ വിവിധ വേദികളിലാണ് നടക്കുന്നത്. 'മരുഭൂമിയിലെ ദാവോസ്' എന്ന് വിശേഷിപ്പിക്കപ്പെടുന്ന സംഗമം ആഗോള തലത്തിലെ നിക്ഷേപക സംരംഭങ്ങളുടെ ഭാവിയാണ് ചര്‍ച്ചചെയ്യുന്നത്. 'എന്തായിരിക്കും അടുത്ത ആഗോള വാണിജ്യ ലക്ഷ്യം' എന്നതാണ് സമ്മേളനത്തിന്റെ പ്രധാന പ്രമേയം. മൂന്നാം പതിപ്പാണ് ഇപ്പോള്‍ നടക്കുന്നത്. ആദ്യ രണ്ടു പതിപ്പുകള്‍ 2017, 18 വര്‍ഷങ്ങളില്‍ നടന്നു. മുന്‍വര്‍ഷങ്ങളില്‍ അമേരിക്കയും യൂറോപ്പും പശ്ചിമേഷ്യയുമായിരുന്നു സജീവം. ഇത്തവണ ഇന്ത്യയും ജപ്പാനും റഷ്യയും ആഫ്രിക്കയും യൂറോപ്പും പശ്ചിമേഷ്യയുമാണ് സജീവ പങ്കാളിത്തം വഹിക്കുന്നത്.
15 ശതകോടി ഡോളര്‍ മൂല്യം വരുന്ന 23 കരാറുകളാണ് ചൊവ്വാഴ്ച ഒപ്പുവെച്ചത്. വിദേശ കമ്പനികളുമായാണ് ഉടമ്പടികളെല്ലാം ഒപ്പുവെച്ചത്. 30 രാജ്യങ്ങളിലെ 300 പ്രഭാഷകരാണ് സമ്മേളനത്തിലുടനീളം പങ്കെടുക്കുന്നത്. അറബ് രാഷ്ട്ര നേതാക്കളും സജീവം. ഇന്ത്യന്‍ പ്രധാനമന്ത്രി നരേന്ദ്ര മോദി ആദ്യദിനത്തിലെ പ്ലീനറി സെഷനില്‍ വൈകീട്ട് 5.30ന് മുഖ്യപ്രഭാഷണം നിര്‍വഹിച്ചു.
രാവിലെ നടന്ന പ്ലീനറി സെഷനുകളിലെ സംവാദങ്ങളില്‍ റിലയന്‍സ് ഇന്‍ഡസ്ട്രീസ് മേധാവി മുകേഷ് അംബാനി പങ്കെടുത്തു. ലുലു ഗ്രൂപ് ചെയര്‍മാനും മാനേജിങ് ഡയറക്ടറുമായ എം.എ. യൂസുഫലിയും സംഗമത്തിലുടനീളം പങ്കെടുക്കുന്നുണ്ട്. 40ല്‍ അധികം വന്‍കിട നിക്ഷേപകര്‍ പങ്കെടുക്കുന്ന സമ്മേളനത്തില്‍ റിലയന്‍സും ലുലു ഗ്രൂപ്പും പ്രധാന സ്‌പോണ്‍സര്‍മാരാണ്.