പ്രവാസികളുടെ വിവാഹ രജിസ്​ട്രേഷൻ നിയമം കേന്ദ്ര സർക്കാർ നടപ്പാക്കാനൊരുങ്ങുന്നു എന്ന വാർത്തയാണ് പുറത്ത് വരുന്നത്. പ്രവാസികൾക്ക്​ നാടുകടത്തലും തടവുശിക്ഷയും ജോലിനഷ്​ടവുമടക്കം ഉണ്ടാകാൻ സാധ്യതയുള്ള വ്യവസ്​ഥകളടങ്ങിയ നിയമമാണ് വിവാഹ രജിസ്​ട്രേഷൻ നിയമത്തിലുള്ളത്. ദി രജിസ്​ട്രേഷൻ ഓഫ്​ മാര്യേജ്​ ഓഫ്​ നോൺ റസിഡൻറ്​ ഇന്ത്യൻ ബിൽ​ 2019’. എന്ന പേരിൽ രാജ്യസഭയിൽ ആദ്യമായി അവതരിപ്പിക്കുന്നത് പ്രവാസികളുടെ ഏറ്റവും പ്രിയപ്പെട്ട മുൻ വിദേശകാര്യമന്ത്രി സുഷമസ്വരാജാണ്.

വിദേശങ്ങളിൽ നടന്ന വിവാഹങ്ങൾ മറച്ചുവെച്ച്​ ഇന്ത്യയിൽ വന്ന് കല്യാണം കഴിച്ച് സ്ത്രീകളെ വഴിയാധാരമാക്കുന്നതിനെതിരെയാണ്​ പുതിയ ബില്ലെന്നാണ്​ സർക്കാർ പറയുന്നത്​. ഇപ്പോൾ ലോക്സഭയുടെ പരിഗണനയിലാണ്​,‘ദി രജിസ്​ട്രേഷൻ ഓഫ്​ മാര്യേജ്​ ഓഫ്​ നോൺ റസിഡൻറ്​ ഇന്ത്യൻ ബിൽ​ 2019’. ബില്ലിലെ വ്യവസ്​ഥപ്രകാരം പ്രവാസികൾ 30 ദിവസത്തിനകം വിവാഹം രജിസ്​റ്റർ ചെയ്യണം. ഇല്ലെങ്കിൽ പാസ്പോർട്ട് തടഞ്ഞുവെക്കുകയോ റദ്ദാക്കുകയോ ചെയ്യും എന്നാണ് പുറത്ത് വരുന്ന വിവരം. നാട്ടിലാണ് വിവാഹമെങ്കിൽ നാട്ടിലും വിദേശത്താണെങ്കിൽ ഇന്ത്യൻ എംബസിയിലോ ഇന്ത്യൻ കോൺസുലേറ്റ്​ പോലുള്ള ഓഫിസിലോ ആണ്​ രജിസ്​റ്റർ ചെയ്യേണ്ടത്​.

ബില്ലിലെ വ്യവസ്​ഥ പ്രകാരം പ്രവാസിക്ക് അയച്ച സമൻസ് നേരിട്ട് കൈപ്പറ്റിയില്ലെങ്കിൽ, വിദേശകാര്യ വകുപ്പ് നിശ്ചയിക്കുന്ന വെബ്സൈറ്റിൽ സമൻസ് അപ്​ലോഡ് ചെയ്താൽ മതി. എന്നാൽ കോടതിയിൽ ഹാജരായില്ലെങ്കിൽ വെബ്സൈറ്റിലൂടെ അറസ്​റ്റ്​ വാറൻറ്​ പ്രസിദ്ധപ്പെടുത്തി പ്രവാസിയെ അറസ്​റ്റ്​ചെയ്യാനും സാധ്യത ഉണ്ട് എന്നാണ് നിയമവിദഗ്ധർ ചൂണ്ടിക്കാട്ടുന്നത് . വിവാഹം രജിസ്​റ്റർ ചെയ്യാത്തവരുടെ പാസ്പോർട്ട് കണ്ടുകെട്ടുന്നതിനാൽ പ്രവാസിയെ നാടുകടത്തി ഇന്ത്യയിൽ എത്തിക്കാം. ഇതിലൂടെ പ്രവാസിയുടെ ജോലി നഷ്​ടമാവാനും സാധ്യതയേറെയാണ്​.

ഇന്ത്യയിലെ പല സംസ്ഥാനങ്ങൾക്കും വിവാഹ രജിസ്ട്രേഷന്​ സമയപരിധിയുണ്ട്​. ഇത്​ കഴിഞ്ഞാൽ പിഴയോടെ രജിസ്​റ്റർ ചെയ്യാം. എന്നാൽ, ബിൽ​ പ്രകാരം കാലാവധിക്കു ശേഷം പിഴയടച്ച് രജിസ്​റ്റർ ചെയ്യാനാവില്ല,എന്നതാണ് ഏറ്റവും വലിയ പ്രതേകത. ഒരാൾ പ്രവാസിയാകുന്നത് സാധാരണഗതിയിൽ 182 ദിവസം ഇന്ത്യയ്ക്ക് പുറത്ത് താമസിക്കുന്ന പശ്ചാത്തലത്തിലാണ്. എന്നാൽ, ബില്ലിൽ പ്രവാസി എന്നതിന്​ ഇത്തരമൊരു നിർവചനമില്ലെന്നുമാത്രമല്ല, ഇന്ത്യക്കുപുറത്ത് താമസിക്കുന്ന ആൾ എന്നു മാത്രമാണ് പ്രവാസിയെ നിർവചിക്കുന്നത്​. ഇതിനാൽ, വിസിറ്റ് വിസയിലുള്ള ആൾ പോലും ബിൽ​ പ്രകാരം കടുത്ത നിയമനടപടികൾക്കു​ വിധേയരാകും എന്നത് തന്നെയാണ് പ്രധാന സവിശേഷത .