ഒമാനില് ഒഴുക്കില്പെട്ട് കാണാതായ രണ്ട് മലയാളികളുടെ മൃതദേഹങ്ങള് കണ്ടെത്തി
ഒമാനില് കനത്ത മഴയെ തുടന്നുണ്ടായ ഒഴുക്കില്പ്പെട്ട് കാണാതായ രണ്ട് മലയാളികളുടെ മൃതദേഹങ്ങള് കണ്ടെത്തി.മസ്കത്തില് നിന്ന് 250 കിലോമീറ്ററോളം അകലെ ഇബ്രിക്കടുത്ത ഖുബാറയില് നിന്നാണ് മൃതദേഹങ്ങള് കണ്ടെത്തിയത്. ന്യൂനമര്ദത്തെ തുടര്ന്ന് വടക്കന് ഗവര്ണറേറ്റുകളില് കനത്ത മഴയാണ് ഞായറാഴ്ച അനുഭവപ്പെട്ടത്. ഇരുവരും അപകടത്തില് പെട്ട വാര്ത്തയറിഞ്ഞ് ഞായറാഴ്ച രാത്രി അന്വേഷിക്കാന് പോയ കൊല്ലം സ്വദേശി അനീഷിന്റെ വാഹനം മറ്റൊരു വെള്ളക്കെട്ടില് അപകടത്തില് പെട്ടിരുന്നു. വാഹനം തകരാറിലായെങ്കിലും ആള് രക്ഷപ്പെട്ടു. കണ്ണൂര് തലശേരി എരഞ്ഞോളി സ്വദേശി ബിജീഷ്, കൊല്ലം സ്വദേശി സുജിത്ത് എന്നിവരാണ് മരിച്ചത്. വാഹനം ഒഴുക്കില് പെട്ട സ്ഥലത്ത് നിന്ന് അല്പം അകലെ നിന്നാണ് മൃതദേഹങ്ങള് കണ്ടെത്തിയത്. സിവില് ഡിഫന്സിന് ഒപ്പം മലയാളി സാമൂഹിക പ്രവര്ത്തകരും നടത്തിയ തെരച്ചിലിലാണ് മൃതദേഹങ്ങള് കണ്ടെത്തിയത്.
ഇബ്രിക്കടുത്ത് അറാഖിയില് സൂപ്പര്മാര്ക്കറ്റ് നടത്തിവരുകയായിരുന്നു ഇരുവരും. അമല എന്ന സ്ഥലത്തെ ഇവരുടെ മറ്റൊരു കടയിലേക്ക് പോകുന്നതിനിടെയാണ് ഇവരുടെ വാഹനം ഒഴുക്കില് പെട്ടത്. ഞായറാഴ്ച വൈകുന്നേരം ഏഴുമണിയോടെയാണ് സംഭവം. ഒഴുക്കില് പെട്ട വാഹനത്തില് കുടുങ്ങിയതിനെ തുടര്ന്ന് ഇവര് സുഹൃത്തിനെ വിളിക്കുകയും മാപ്പ് അടക്കം അയച്ചുകൊടുക്കുകയും ചെയ്തിരുന്നു. സുഹൃത്തുക്കള് അറിയിച്ചതിനെ തുടര്ന്ന് ഇന്ത്യന് എംബസി വിഷയത്തില് ഇടപെടുകയും രാത്രി തന്നെ തെരച്ചില് ആരംഭിക്കുകയും ചെയ്തു. രാത്രി തന്നെ ഇരുവരും സഞ്ചരിച്ച വാഹനം കണ്ടെത്തിയിരുന്നു.
തിങ്കളാഴ്ച രാവിലെ തെരച്ചില് പുനരാരംഭിച്ച് വൈകാതെ ബിജീഷിന്റെ മൃതദേഹം കണ്ടെത്തി. ഉച്ചയോടെയാണ് കുറച്ചുകൂടി ദൂരെ നിന്ന് സുജിത്തിന്റെ മൃതദേഹം കണ്ടെത്തിയത്. സുജിത്തിന്റെ മാതാപിതാക്കളും ഭാര്യയുമടക്കം കുടുംബാംഗങ്ങള് ഒമാനിലുണ്ട്. ബിജീഷും കുടുംബസമേതമായിരുന്നു താമസം.
https://www.facebook.com/Malayalivartha