കുവൈറ്റില്‍ പൊതുമാപ്പ് പ്രയോജനപ്പെടുത്തുന്ന ഇന്ത്യക്കാരുടെ രജിസ്‌ട്രേഷന്‍ നാളെ മുതല്‍ നടക്കും. ഏപ്രില്‍ 20 വരെയാണ് ഇന്ത്യക്കാരുടെ രജിസ്‌ട്രേഷന്‍. രാവിലെ എട്ടു മുതല്‍ ഉച്ചക്ക് രണ്ടു വരെയാണ് പ്രവര്‍ത്തന സമയം. കാലാവധിയുള്ള പാസ്‌പോര്‍ട്ട് കൈവശമുള്ളവര്‍ യാത്രക്ക് തയാറെടുത്ത് ലഗേജ് ഉള്‍പ്പെടെയാണ് വരേണ്ടത്. യാത്ര ദിവസം വരെ കുവൈത്ത് അധികൃതര്‍ ഇവര്‍ക്ക് താമസമൊരുക്കും. പാസ്‌പോര്‍ട്ട്, സിവില്‍ ഐഡി, എമര്‍ജന്‍സി സര്‍ട്ടിഫിക്കറ്റ് തുടങ്ങിയ രേഖകളൊന്നും കൈവശമില്ലാത്തവര്‍ ഫര്‍വാനിയ ബ്ലോക്ക് ഒന്നിലെ ഗേള്‍സ് പ്രൈമറി സ്‌കൂളില്‍ തിരിച്ചറിയല്‍ പരിശോധനക്ക് എത്തണം. ഈ ഘട്ടത്തില്‍ ഇവരെ ഷെല്‍ട്ടറിലേക്ക് മാറ്റുന്നില്ല. അതുകൊണ്ടുതന്നെ ഇത്തരക്കാര്‍ യാത്രക്കുള്ള ലഗേജ് കൊണ്ടുവരേണ്ടതില്ല. എംബസി നിയോഗിച്ച വളണ്ടിയര്‍മാര്‍ മുഖേന ഔട്ട്പാസിന് അപേക്ഷിച്ചവര്‍ ഇപ്പോള്‍ പൊതുമാപ്പ് രജിസ്‌ട്രേഷന് വരേണ്ടതില്ല. അവര്‍ രേഖകള്‍ക്കായി എംബസിയിലേക്കും വരേണ്ടതില്ല. എമര്‍ജന്‍സി സര്‍ട്ടിഫിക്കറ്റ് നടപടിക്രമങ്ങള്‍ പൂര്‍ത്തിയായാല്‍ അവരെ അറിയിക്കുകയും മാര്‍ഗനിര്‍ദേശങ്ങള്‍ നല്‍കുകയും ചെയ്യും.പാസ്‌പോര്‍ട്ട് കൈവശമുള്ളവര്‍ക്ക് പുരുഷന്മാര്‍ക്ക് ഫര്‍വാനിയ ബ്ലോക്ക് 1 സ്ട്രീറ്റ് 76ലെ ഗേള്‍സ് സ്‌കൂള്‍, ജലീബ് അല്‍ ശുയൂഖ് ബ്ലോക്ക് നാല് സ്ട്രീറ്റ് 250ലെ നഈം ബിന്‍ മസൂദ് ബോയ്‌സ് സ്‌കൂള്‍ എന്നിവിടങ്ങളിലും സ്ത്രീകള്‍ക്ക് ഫര്‍വാനിയ ബ്ലോക്ക് 1, സ്ട്രീറ്റ് 122ലെ അല്‍ മുത്തന്ന ബോയ്‌സ് സ്‌കൂള്‍, ജലീബ് അല്‍ ശുയൂഖ് ബ്ലോക്ക് നാല് സ്ട്രീറ്റ് 200ലെ റുഫൈദ അല്‍ അസ്‌ലമിയ ഗേള്‍സ് സ്‌കൂള്‍ എന്നിവിടങ്ങളിലുമാണ് രജിസ്‌ട്രേഷന് സൗകര്യം ഒരുക്കിയിട്ടുള്ളത്.