പൊടിക്കാറ്റില് മുങ്ങി ദുബായിലും ഷാര്ജയിലും; ദൂരക്കാഴ്ച കുറഞ്ഞതോടെ ഗതാഗതം തടസ്സപ്പെട്ടു
ശക്തമായ പൊടിക്കാറ്റില് ദുബായില് പല പ്രദേശങ്ങളും പ്രതിസന്ധിയിലായി. ഇന്ന് ഉച്ചയ്ക്ക് രണ്ടരയോടെയാണ് പൊടിക്കാറ്റ് അനുഭവപ്പെട്ടത്. പൊടിക്കാറ്റിനെ തുടര്ന്ന്് ദൂരക്കാഴ്ച കുറഞ്ഞതോടെ ഗതാഗതം തടസ്സപ്പെട്ടു. എന്നാല് എവിടെയും അപകടം റിപ്പോര്ട്ട് ചെയ്തിട്ടില്ല. ചിലയിടങ്ങളില് മഴയും പെയ്തു. ദുബായിലും ഷാര്ജയിലുമാണ് കാറ്റ് ഏറ്റവും ശക്തമായത്. ഹുങ്കാരത്തോടെ ഇടവിട്ട് മിനിറ്റുകളോളം വീശിയ കാറ്റില് പുറം സ്ഥലങ്ങളില് ജോലി ചെയ്യുന്നവരും വാഹനങ്ങളും വലഞ്ഞു. പലരും റോഡരികില് വാഹനം നിര്ത്തി കാറ്റ് അകന്നുപോകാന് കാത്തിരുന്നു.
റോഡുകളിലും മറ്റും ചപ്പുചവറുകളും നിറഞ്ഞിട്ടുണ്ട്. തുടര്ന്ന് അന്തരീക്ഷം മൂടിക്കെട്ടിയ നിലയിലാണ്. ദുബായില് ഖിസൈസ്, മുഹൈസിന, മിര്ദിഫ്, അല്ഖൂസ് ഭാഗങ്ങളിലും ഷാര്ജ അല് നഹ് ദ ഏരിയയിലുമാണ് ഏറ്റവും ശക്തമായ കാറ്റനുഭവപ്പെട്ടത്. അരമണിക്കൂറിന് ശേഷം കാറ്റ് ഏതാണ്ട് നിലച്ചു. ഷാര്ജ മലീഹ, സുയുഹ് എന്നിവിടങ്ങളില് നേരിയ തോതില് മഴയും പെയ്തു.
https://www.facebook.com/Malayalivartha
