സമൂഹമാധ്യമങ്ങളൊന്നാകെ മതവും ജാതിയും മറന്ന് കേരളം ഒന്നിച്ചു നിന്ന പ്രളയദുരിതകാലത്തെ വാഴ്ത്തുകയാണ്. എന്നാല്‍ പ്രളയം വരുന്നതിന് മുമ്പും മതത്തിന്റെയും ജാതിയുടെയും വേലിക്കെട്ടുകള്‍, പൊളിച്ചെറിഞ്ഞ അനേകരുണ്ടായിരുന്നുവെന്ന് പറയുകയാണ് യൂത്ത് ലീഗ് സംസ്ഥാന ജനറല്‍ സെക്രട്ടറി പികെ ഫിറോസ്.

മുസ്ലീം ദമ്പതികളായ മജീദും റംലയും എടുത്തു വളര്‍ത്തി ഹൈന്ദവവിശ്വാസത്തില്‍ വളര്‍ത്തിയ മകള്‍ മഞ്ജുവിനെ ഹിന്ദുമതാചാര പ്രകാരം നരസിംഹ ക്ഷേത്രത്തില്‍ വെച്ച് വിവാഹം കഴിപ്പിച്ച മനോഹരമായ അനുഭവം പങ്കുവെക്കുകയാണ് ഫിറോസ്. പ്രളയക്കെടുതിക്കിടയിലാണോ കല്ല്യാണത്തെ കുറിച്ച് പറയുന്നതെന്ന് മുഖം ചുളിക്കാന്‍ വരട്ടെ എന്ന മുഖവുരയോടെയാണ് പികെ ഫിറോസ് ജാതിമതാതീതമായി നടന്ന ഒരു വിവാഹത്തെ കുറിച്ച് ഫെയ്‌സ്ബുക്കില്‍ പങ്ക് വെച്ചിരിക്കുന്നത്.

മതത്തിന്റെയും ജാതിയുടെയും വേലി പൊളിച്ചെറിയാന്‍ പലര്‍ക്കും പ്രളയം വരേണ്ടി വന്നുവെങ്കില്‍ ഇങ്ങിനെയും മനുഷ്യര്‍ ഈ നാട്ടിലുണ്ടെന്നത് വലിയ പ്രതീക്ഷയാണ്. അതിനാലാണ് ഈ വിവാഹത്തെ കുറിച്ച് പ്രളയകാലത്ത് കുറിക്കുന്നതെന്നും ഫിറോസ് പറയുന്നു

ഫെയ്‌സ്ബുക്ക് കുറിപ്പിന്റെ പൂര്‍ണ്ണരൂപം

എന്റെ നാട്ടില്‍ നടന്ന ഒരു കല്ല്യാണത്തെ കുറിച്ചാണ് പറയുന്നത്. ഈ പ്രളയക്കെടുതിയിലാണോ കല്ല്യാണത്തെ കുറിച്ച് പറയുന്നത് എന്ന് മുഖം ചുളിക്കാന്‍ വരട്ടെ. ഈ കല്യാണം വേറെയാണ്. ഇത് മജീദിക്ക, മകള്‍ മഞ്ജുവിനെ കല്യാണം കഴിപ്പിച്ച കഥയാണ്. കഥയല്ല കാര്യം!

കുന്ദമംഗലത്തിനടുത്തുള്ള പെരിങ്ങളത്തെ മജീദിക്കയും റംലത്തയും മഞ്ജുവിന് പത്താം വയസ്സുള്ളപ്പോള്‍ എടുത്തു വളര്‍ത്തിയതാണ്. ഹൈന്ദവമാതാപിതാക്കളുടെ മകളായ അവളെ മകളെപ്പോലെയല്ല മകളായി തന്നെയാണ് കരുതി വളര്‍ത്തിയത്. മകനും നിയോജക മണ്ഡലം എം.എസ്.എഫ് സെക്രട്ടറിയുമായ ജുനൈദിന് അങ്ങനെ മഞ്ജു സഹോദരിയായി. എം.എല്‍.ടി വരെ നല്ല വിദ്യാഭ്യാസവും നല്‍കി. ഒടുവില്‍ ജോലിയും ലഭിച്ചു.

ഇന്ന് മഞ്ജുവിന്റെ വിവാഹമായിരുന്നു. എല്ലാം ഹിന്ദു മത ആചാര പ്രകാരം. കൂഴക്കോട് നരസിംഹ ക്ഷേത്രത്തില്‍ വെച്ചായിരുന്നു താലികെട്ട്. വിവാഹം ആഘോഷമാക്കാനായിരുന്നു നാട്ടുകാര്‍ ആഗ്രഹിച്ചിരുന്നതെങ്കിലും പ്രളയക്കെടുതി മൂലം ഉപേക്ഷിച്ചു. എങ്കിലും നാട്ടുകാരും ഞങ്ങള്‍ കുറച്ചു പേരും സല്‍ക്കാരത്തില്‍ പങ്കാളികളായി.

മതത്തിന്റെയും ജാതിയുടെയും വേലി പൊളിച്ചെറിയാന്‍ പലര്‍ക്കും പ്രളയം വരേണ്ടി വന്നുവെങ്കില്‍ ഇങ്ങിനെയും മനുഷ്യര്‍ ഈ നാട്ടിലുണ്ടെന്നത് വലിയ പ്രതീക്ഷയാണ്. മജീദിക്കയെയും റംലത്തെയും കുടുംബത്തെയും ആത്മാര്‍ത്ഥമായി അഭിനന്ദിക്കുന്നു. ഒപ്പം മഞ്ജുവിനും വരന്‍ സുബ്രഹ്മണ്യനും സന്തോഷകരമായ ജീവിതം ആശംസിക്കുന്നു.